Ordiziako Udalak bono-kanpaina berri bat jarriko du abian hirugarren sektorea sustatzeko asmoarekin. “Orain arte egin dugun bono kanpainetan egin dugun moduan, oraingoan ere helburua bera da: gaur egun udalerrian dugun merkataritza-sektorea indartzea eta bultzatzea”, zehaztu du Maitane Alvarez, Ordiziako alkateordeak. “Beste kanpainetan balorazio oso positiboa jaso dugu, eta aldi honetan ere herriko merkataritza sektoreari onura egingo diola espero dugu”, gaineratu du.

Guztira 3.000 bono jarriko dira salgai. Bono bakoitzagatik 20 euro ordainduz 30 euro gastatzeko aukera izango da. Hau da, erosleak 20 euro ordainduko ditu baina bonoak 30 euroko balioa izango dute, izan ere, Udalak gainerako 10 euroak jarriko ditu.

Edozein pertsonak bonoak erosteko aukera izango du: “Ordiziako merkataritza sustatzeko hartutako erabakia da hau, Ordizia erreferente izan dadin”, gehitu du alkateordeak. Beste kanpainetan egin den moduan, pertsona bakoitzak, gehienez ere, bere izenean eta beste baten izenean erosi ahal izango du, ordezkatuaren NANa aurkeztuz.

Bonoak, berriz, azaroan bakarrik erabili ahalko dira, azaroaren 1etik 30era.

Non eros daitezke bonuak?

Urriaren 23tik aurrera, astelehena, eta izakinak agortu arte erosi ahalko dira. Ordiziako Merkataritza Bulegoan bakarrik eskuratu ahal izango dira, Santa Maria kaleko 21ean. Ordutegia 09:00etatik 19:00etara izango da, etenik gabe.

Ordiziako Udalak egindako aurreikuspenaren arabera, 80 eta 100 saltoki bitartean gehituko zaizkio kanpainari eta erosketa-bonuak erosten dituzten pertsonek denda hauetan trukatu ahal izango dituzte.

Parte hartzen duten saltokiei dagokienez, elikadura-dendak kanpainarekin bat egin ahal izango dutela da aurtengo berrikuntza, gainerako merkataritza, ostalaritza eta zerbitzu establezimenduekin batera.

 Hala, tokiko merkataritzaren bidez erosketak azaroan egiteko aukera izango dute herritarrek, dagoeneko Gabonetako erosketetan pentsatuta edo beste behar batzuei erantzuteko eta, zalantzarik gabe, Ordiziako Udalak Ordizian merkatarien elkartearekin lankidetzan abian jarriko duen bonu-kanpainaren edizio berri honetan islatuko den kalitatezko eskaintza zabalaren bidez premia horiei erantzuna eman ahal izango die.