Apirilaren 12an, asteazkena, ospatuko da Ordizian Artzain Eguna. “Guretzako egun handia da Artzain Eguna. Asteazkeneroko azokaren altzoan ospatuko dugu aurten ere urteko lehen azoka berezia, Artzain Egunekoa. Transhumantzia irudikatu eta artzainen lana , eta Idiazabal Gazta Berriaren aurkezpena ere egingo dugu. Aurten, Donostiako Rekondo jatetxeko Lourdes Rekondok moztuko du gazta, eta Zuberoa jatetxeko Hilario Arbelaitz sukaldaria omenduko da, urte guzti hauetan egindako lanari aitortza eginez”, adierazi du Adur Ezenarro, Ordiziako alkateak.

Artzainak eta gazta izango dira protagonista. Udalak ELE Latxa Ardiaren Gipuzkoa elkartearen, Lurgintza, Idiazabal Gaztaren Jatorri Izendapena eta Ordiziako Idiazabal Gaztaren Kofradiarekin batera antolatzen du egun handi hau  Besteak beste, Idiazabal gaztaren denboraldi berriaren aurkezpen ofiziala egingo da, Donostiako Rekondo Jatetxeko Lourdes Rekondoren eskutik.

Aharien erakusketa-lehiaketa

Aurten, Garagartza plazan, 9:00etan hasita, latxa arrazako 50 bat artzainen aharien erakusketa-lehiaketa eta salmenta egingo da. Bertan, 200 abelburu inguru  izango dira ikusgai, zalantzarik gabe, Euskal Herriko erakusleiho garrantzitsuena gai horren inguruan, kalitate eta kopuruz Euskal Herriko bakarra.

Bi   motako animaliak izango dira erakusketa horretan: latxa mutur-gorriak eta latxa mutur-beltzak.    

Mutur-gorrien kasuan Aralar, Ernio, Izarraitz, Gabiria, Azpeitia edo Donostialdeko animaliak izango dira ikusgai.  Mutur-beltzetan, berriz, Urbia, Elgoibar, Legazpi, Ordizia, Zerain eta Oñati ingurukoak.

Garagartza Plazan gazta egingo da zuzenean haurren gozamenerako, nagusiki. Baina oso erakargarriak diren beste ekintzak ere izango dira. Esaterako, mamia dastatzea eta eguerdi partean ardien ile-mozketa, makinaz zein eskuz.

Transhumantzia birgogoratuz

Goizeko 11.00ak aldera, garai batean artaldeak negua bukatzen zenean mendira joateko herri barrutik igarotzen ziren bezala, Ordiziako Herri Zaharretik barrena ibiliko dira 2.000 ardi baino gehiago. Modu honetan antzinatik egin izan den eta denbora berriek zailtzen duten menditik haranerako eta alderantzizko desplazamendua gogoratuz, askok oinez eta errepidetatik egin behar izaten dutena.  Maiatzaren lehenengotik aurrera egin ahal izango dute mendiko larreetara buelta.

Lourdes Rekondo eta Hilario Arbelaitz

11:15etan, Ordiziako Udaletxeko Batzar aretoan, Donostiako Rekondo Jatetxeko Lourdes Rekondok gazta gaztea ebakiko du.  Baina, aldez aurretik, berriki Zuberoa Jatetxe entzutetsua itxi berri duen Hilario Arbelaitzi omenaldia egingo zaio Idiazabal Gaztaren difusioan egindako lanagatik.

Baita, gaztaren erregulartasun-kalitate sariak banatuko zaizkie Segurako Eneko Goiburu Artzaiari, bigarren urtez jarraian eta Idiazabalgo Abel Goiburu Irastorzaren Goiburu Gaztandegiari ere.

Ohitura den moduan, goiz guztian zehar  Garagartza Plazan 40 Euskolabel arkume burruntzian prestatuko ditu Karlos Ibarrondok. 11.30etatik aurrera arkume pintxoak salgai jarriko dira eta bildutako dirua ASPANOGIrentzat, Gipuzkoako Haur Minbizidunen Gurasoen Elkartearentzat, izango da.

EGITARAUA

9:00- Ahari eta ardien erakusketa Garagartza plazan.

Eusko Labela duten esne bildotsak burruntzi eran erreketa Garagartza Plazan.

11:00- Artaldeak igaroko dira gune Historikoan barrena.

11:15- Idiazabal gaztaren denboraldi berriaren aurkezpen ofiziala, Udaletxeko Batzar aretoan. Donostiako Rekondo Jatetxeko Lourdes Rekondok ebakiko du gazta berria.

Aldez aurretik, Hilario Arbelaitz sukaldaria omenduko da, eta gazta kalitatearen eta erregulartasunaren sariak emango dira.

11:30- Gazta egitea eta mamia dastatzea Garagartza plazan.

11:30- Eusko Labela duten burruntzian erretako esne bildotsen dastatzea, Garagartza plazan, ASPANOGIren, Gipuzkoako Haur Minbizidunen Gurasoen Elkartearen, alde.

12:15- Ile-mozte erakustaldia, Garagartza Plazan.

***Goizean asteroko ohiko feria egingo da, gazta-salmentarako eta Goierriko artisautza produktuen saltokiak ere jarriko dira. Trikitilariek eta dultzaina-joleek alaituko dute herria.