Futbola, eskubaloia eta saskibaloiko norgehiagokak, eta atletismoko mitin-a Aupatv.com plataformaren bidez jarraitu ahalko dira

Larunbat honetan bertan, Ordiziako kirol taldeen emanaldiak zuzenean ikusteko aukera zabalduko da. Udalak Akhonmedia ikus-entzunezko enpresarekin batera hitzarmen bat abiatu du, eta goi mailan jokatzen duten kirol taldeen partidak zuzenean erretransmitituko dira modu honetan. Hain zuzen, Akhonmediak sortutako proiektua da Aupatv, eta modu honetan Ordiziako kirol partidak eskainiko zaizkie herritarrei eta interesa dutenei. Guztiak Aupatv.com plataformaren bidez ikusgai izango dira. Gainera, behin emanaldiak amaitu ostean, Ordiziako Udalaren Youtubeko kanalean geldituko dira partidak, nahi duenak bertan ikus ditzan.

“Ordiziako Udalak kirolaren alde egiten duen apustua tinkoa da, eta gaur aurkeztu dugun proposamenak eskaintza zabaldu eta herritarrei bertako kirolarien kirol saioak jarraitzeko aukera emango die”, azaldu du Jon Ander Caballero, Ordiziako Kirol zinegotziak. Oraingoz, futbol, eskubaloi, saskibaloi eta ekainaren 19an egingo den atletismoko miting-a eskainiko dira. Hala ere, zinegotziak honakoa adierazi du: “hauek izango dira oraingoz egingo diren zuzeneko erretransmisioak, baina beharren arabera joango gara egokitzen eta aztertzen ea beste zenbait kiroletako partidak ere eskaini ditzakegun zuzenean”.

Covid19aren agerpena dela eta, partida horiek guztiak ateak itxita eta publikorik gabe egiten ari dira, eta bide horretan, Caballerok nabarmendu du “arazoari irtenbidea” emateko modu “ezinhobea” dela hau, modu honetan nahi dutenek partidak ikusteko aukera izango baitute, doan eta zuzenean.

Honakoa da egitaraua:

- Martxoak 6, larunbata, 11:30etan futbolarekin hasiko da ekimena. Ohorezko erregional mailako Ordizia Kirol Elkarteak eta Zarautz Kirol Elkarteak jokatuko dute partida Altamira zelaian.

- Martxoaren 7an, igandea, eskubaloiko senior nesken partida erretransmitituko da. Hala, 12:00etan, Majorin jokatuko dute Ordiziabiok2 eta Pulpo taldeak.

- Martxoaren 13an, saskibaloiaren txanda izango da. Senior 1. Nazionaleko Ordizia eta Getxoren saioa ikusgai izango da 18:00etatik aurrera.

- Martxoaren 20an, ohorezko erregionalaren futbol partida emango da. 16:00etan hasiko da Ordizia eta Oiartzunen arteko lehia, Altamiran.

- Martxoko zuzeneko emanaldiak, martxoaren 21ean amaituko dira, eskubaloiko senior 1. Nazionalaren partidarekin. 12:00etan, Ordizia Siglo XX eta Soraluce BKE taldeak izango dira.

Altamirako anexoko argiteria berritzen ari da, zelaian dauden lau dorreetan. Argi puntu guztiak LED sistemarengatik aldatu dira; 24 argi puntutatik 16era pasako dira, baina argiztapen maila hobetu egingo da. Lanak biharko, osteguna, amaituta egongo dira.

“Kirol taldeak urteak daramatzate berrikuntza hori eskatzen. Anexoko argiteria aldatzea beharrezkoa zen dudarik gabe, izan ere, egoera kaxkarrean zegoen. Urtero berritzen ziren argi puntuak; eta orain erabaki da guztiz aldatzea sistema. Hala, ekonomikoki aurrezpena ekartzeaz gain, argiztapen kutsadura jaitsiko da”, azaldu du Jon Ander Caballero, Ordiziako Udaleko kirol zinegotziak.

45 metroko estalpea prest dago, eta bertan kirolariek entrenatzeko aukera izango dute

“Dagoeneko amaitu dugu Ordiziako Altamira atletismo pistako estalpearen obra”, azaldu du Jon Ander Caballero, Kirol zinegotziak.

Elkarlanaren emaitza izan da lanketa. Txindoki atletismo klubeko kideek hasieratik azaldu zuten euria egiten zuenean babesteko estalitako gune baten beharra. "Guri ideia ona iruditu zitzaigun eta horregatik eraiki da estalkia", gaineratu du Caballerok. Altamirako pistaren kokapena eta forma ikusita, estalitako gunerako egokiena harmailetatik ateratzea izan da aukeratutako metodoa: 45 metroko eremu estalia eta 3 kale hartu dituena. “Pozik gaude emaitzarekin, eta nahiz eta pandemiak denbora epeetan eragina izan duen, obra amaitu da”, zehaztu du kirol zinegotziak.

Gainera, teilatua metakrilatozkoa jarri da, argitasuna mantentzeko asmoarekin. Euriaz babestutako gunea izango da, baina entrenatzeko arazorik ekarriko ez duena herritar eta kirolarientzat.

Estalkiaz gain, kanpoko eraztun bat ere eraiki da pistako azken kalean, belar artifizialarekin. Honekin espazio gehiago gehitzen da korrikalariek euren entrenamendu osoak egin ahal izateko. Horrez gain, luzera jauziko egungo korridoreetako bat pisu gunetik beste leku batera aldatu da.

Asteburu honetan Ordizian errugbiko epaile izateko formakuntza ikastaroa izango da, emakumeei zuzendua. Ekimen hau “Emakumeak errugbian” programaren barruan kokatzen da, Kirol Kontseilu Nagusia eta Emakume programarekin elkarlanean, eta Ordizia Rugby taldearen babesarekin.

“Guretzako ohore bat da halako ekimen bat Ordizian garatzea. Emakumeak kirola egitera bultzatzen jarraituko dugu, haiei babesten eta aukera berriak sortzen”, nabarmendu du Jon Ander Caballero, kirol zinegotziak.

Ikastaro hau errugbi munduan barneratu nahi duen emakume orori dago zuzenduta, emakumezkoen errugbia hazi eta bultzatzeko asmoarekin, baina baita ere entrenatzaile edo kirolari hobea izateko araudia hobeto ezagutu nahi dutenentzat. Dagoeneko izen-ematea beteta dago eta 25 izango dira formazio hau jasoko duten emakumeak.

Formakuntza ekintza honek zati teoriko bat izango du, Barrenan eskainiko dena, baina baita alderdi praktikoa ere; hau Altamira zelaian garituko da. Parte-hartzaileak lehenengo harremana izango dute errugbian horren garrantzitsua den epaile lanarekin.

Probak gainditzen dituztenek Level 1 World Rugby ziurtagiria lortuko dute (arbitroen 1. maila), eta horrek 18 urtetik beherako kategoriara arteko lehiaketetan epaile izateko aukera emango die.