Parte hartu nahi dutenek izena eman behar dute astean zehar asegurua egin ahal izateko

Ordiziako Udalak Agenda 21ren barruan erreka eguna antolatu du. Oria ibaiaren zonalde bat garbituko da auzolanean, Urdaneta kalean.  Ekimen honen helburu nagusia ez da ahal den eta hondakin gehiena biltzea, baizik eta ibaiaren inguruan kontzientziazio berezi bat sortzea, zerbait propioa bezala ulertuaz, ekosistema bezala duen garrantziaz jabetzeko eta zaintzen ikasteko.

Ekimena datorren larunbatean, urriaren 1ean, goizeko 10.00etan izango da. Parte hartu nahi duenak Cibeles bezala ezagutzen den ingurura gerturatu behar da. Garbiketa lana 12.00etarako amaituta egongo da eta ondoren mokadu bat eskainiko da.

Parte hartuko duen talde bakoitzari Udalak zabor bilketarako beharrezko eskularruak eta zabor poltsak emango dizkio. Parte-hartzaile bakoitzaren esku geratzen da arropa eta oinetako egokiekin joatea garbiketa egunean. Udaleko garbiketa zerbitzuko langileek ere parte hartuko dute,  inongo arriskurik egon ez dadin. 

Erreka garbiketan parte hartzen duten guztiei asegurua egiten zaie. Asegurua egin ahal izateko auzolanean parte hartu nahi duten guztien izen abizenak, jaioteguna eta baldin badaukate NAN/DNI zenbakia behar dira. Parte-hartzaileen izenak Laiako Rosa Aurkiari (Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.) edo telefonoz 943164172 / 653013702) eman irailaren 30a –ostirala- baino lehen.

N-1etik dagoen sarrera-irteera eta Eroskiko ingurunea egokituko dira

Ordiziako San Bartolome auzoko zirkulazioa berrantolatuko duen proiektua onartu du Gipuzkoako Foru Aldundiko Bide Azpiegituretako Departamentuak. Ekimen honen baitan, foru erakundeak inguru hau egokitzeko hitzarmena sinatuko du Ordiziako Udalarekin eta, besteak beste, San Bartolome auzoak N-1etik daukan sarrera-irteera adarra berrituko da, oinezkoentzako espaloia eta bizikletentzako bidegorria eginez. Eroski hipermerkatuaren inguruan ere egokitzapen lanak egingo dira. Gainera, pantaila akustikoak jarriko ditu Aldundiak Ordizian, N-1eko 421,680 eta 421,820 kilometro puntuen artean.

Txartelak udaletxean eskatu edo entregatu behar dira

Pixoihalak jasotzeko edukiontziak erabili behar dituztenek txartel bat erabili behar izango dute. Gaur egun organikoaren poltsak jasotzeko erabiltzen den txartel bera aktibatzea erabaki da, eta organikoa eta errefusa botatzeko edukiontziak irekitzeko ere balio izango du. Hori dela eta, txartelik ez duenak eskatu egin behar du eta txartela duenak eta pixoihalen edukiontzia ireki behar duenak udaletxean utzi behar izango du txartela aktibatzeko.  

Txartelak jasotzeko kutxa bat ipini da herritarren arreta bulegoan (astelehenetik ostiralera irekita lanegunetan 8:00etatik 13:30era) eta beste bat udaltzaingoan (astelehenetik ostiralera lanegunetan 13:30etik 20:30era). Sasietara bidaliko dira txartelak eta pixoihalak botatzeko edukiontziak irekitzeko prest daudenean postaz bidaliko zaizkie jabeei. Edukiontziak Ordizian abuztuan eta irailean zehar ipiniko dira. 

Zaindariaren jaietako hondakinen bilketan ordutegian eta egutegian aldaketak egongo dira

Ordiziak hondakinen bilketa sisteman aldaketak onartu ditu, biztanleek iragan martxoan onartutako erabakiaren ondoren. Jose Miguel Santamaria Alkateak eta Ingurumen Teknikaria den Angelica Morenok, berritasun hauen aurrerapen bat eskaini zuten eta Santa Ana jaietan hondakinen bilketaren ordutegia jakitera eman dute.

Edukiontziak abuztuan ezartzen hasiko dira, dagokion azterketa teknikoa egina dagoelarik, momentuz “atez ateko” sistema jarri baino lehen zeuden tokietan. Hortik aurrera etxebizitzetan sortutako hondakinen bilketa edukiontzi kolektiboetan egingo da. Irailaren bukaerarako denak jarrita egotea aurreikusten da.