Buztuntzako auzoaren eraberritze proiektuaren baitan, Tipi enpresa ari da arduratzen parte hartze prozesuez. Hemen elkarrizketa:
1 ) Zein balorazio egiten duzue Buztuntza auzoaren eraberritzearen inguruko parte hartzearen inguruan?
Balorazioa positiboa da. Auzoko eragile ezberdinak presente egon dira gauzatutako ekintzetan: Eskolako zuzendaritza, Guraso Elkartea, komertzioetako pertsonak, auzotarrak orokorrean... eta hori garrantzitsua da. Prozesu parte-hartzaile bat planteatzean, kuantitatiboa bezain garrantzitsua da informazio kualitatiboa lortzea, eta prozesu honetan hainbat mekanismo ezberdin jarri dira martxan informazio anitzak jasotzeko eta parte-hartzeko modu ezberdinak ahalbidetzeko (tailer presentzialak, sakoneko elkarrizketak, online galdeketak, inkesta telefonikoak). Orain gainera, urte bukaerara artean, zenbait saio garatuko ditugu Urdaneta eskolako haurrekin beraien ikuspegia eta beharrak ere proiektuan txertatzeko.
2) Jendearen iritziek zer adierazten dute? Zerren beharra ikusten dute, orokorrean?
Behar handia dago orokorrean kale eta espaloiak atontzeko eta irisgarritasun unibertsala bermatzeko. Honez gain, bereziki nabarmendu da ibai ondoko pasealekua berritzeko eta irisgarri egiteko beharra. Jende nagusi askok erabiltzen duen tokia da hori, auzoko altxor txiki bat, baina zorua zaharkituta dago eta Gudarien Etorbidearekin konektatzen duten eskailerak muga handia dira. Buztuntza eta Idoiaga plazak atontzea, goxoagoak egitea eta bertan erabilera berriak ahalbidetzea ere hainbatetan errepikatu diren eskaerak dira.
3) Goiko galderaren erantzunari jarraituz, zein zailtasun egon daitezke behar horiek lortzeko?
Egia da auzoko kale eta plaza guztiak berritu eta irisgarri egitea inbertsio handia dela. Ondorioz, faseka planteatu beharko da hobekuntza horien egikaritzea. Hala ere eta horregatik, garrantzitsua da Plan Integrala bere osotasunean irudikatzea, hau da, hobekuntzak planteatzean auzoaren ikuspegi integrala aintzat hartzea, ondoren, gutxi-gutxika gauzatzen joan arren estrategia global eta zentzuzko bati erantzun diezaion.
4) Jendearen eskariak betetzen badira, eraldaketa nabarmena izango du auzoak?
Baietz esango nuke, eraldaketa nabarmenak baina aldi berean oso ikusgarriak izan behar ez dutenak. Espaloiak zabaltzea, zebrabideetako altueratxoa kentzea, oinezkoen eguneroko ibilbideei erantzungo dieten bideak erraztea... aldaketa txikiak eman dezakete baina egunerokoan inpaktu handi-handia dutenak, batez ere mugikortasun arazoak dituzten pertsonentzat eta zaintza lanak gauzatzen dituzten horientzat.
5) Beste herriren batean egin duzue holako galdeketarik? Zein ondorio izan du?
Herri eta hirien diseinuaren inguruan erabakiak hartzean funtsezko deritzogu bertako herritarren beharrak eta proposamenak jasotzeko mekanismoak ahalbidetzea, eguneroko bizitza hobetzeaz ari baikara, eta herritarrak dira eguneroko hori hobeen ezagutzen dutenak. Eta helburu horrekin, garatu izan ditugu bai beste herri batzuetan antzeko prozesuak espazio publikoa hobetzeari bideratuta.
Lekeitioko San Andres auzoan adibidez etxe inguruetako kale eta berdeguneak guztiz aldatu ziren auzotarrekin batera diseinatutako plan baten ondorioz. Oinezkoentzako bide eta txokoak handitu egin ziren nabarmen, kotxeen presentzia gutxitu egin zen, kota aldaketak desagerrarazi egin ziren irisgarritasuna handitzeko, suhiltzaileen kamioia igaro ahal izateko bideak zabaldu ziren etab.
Durangon adibidez espazio publikoaren diagnosi bat gauzatu genuen, baina kasu honetan herriko emakumeekin. Hainbat espazio identifikatu ziren, bai segurtasun sentsazio eza transmititzen zutelako, edo bai egurerokotasunean zaintza lanak egitea oztopatzen zutelako. Diagnosi horren ondorioz Udalak hainbat neurri jarri zituen martxan leku horiek hobetzeko, batzuetan espezifikoak, beste batzuetan orokorragoak (argitasuna, irisgarritasuna, ikusgarritasuna etab.).
* hurrengo pausuak
Orain estudio.k arkitektura estudioa Plan Integralaren aukera ezberdinak marrazten ari da auzotarren iritzia abiapuntutzat hartuta. Prest daudenean, bilera bat antolatuko dugu aukerak ezagutarazteko eta astebetean zehar ikusgarri egongo dira herritarrek ikusteko eta horien inguruko iritzi eta balorazioak egiteko.
Balorazio horiek aintzat hartuta, estudio.k-k planaren behin-betiko bertsioa marraztuko du eta azken bilera bat antolatuko duzu berau aurkezteko.
Aldi berean, orain hasi eta urte bukaerara arte Urdaneta Eskolako haur eta irakasleekin elkarlanean ibiliko gara umeen beharrak eta proposamenak jasotzeko. Proposamen hauek Planaren behin-betiko bertsioan txertatuko dira.
