Ekainaren 28an, LGBTI+ harrotasunaren egunean, harro gaudela aldarrikatu nahi dugu. Harro gaude gure bizitzez, harro gure genealogiaz eta harro LGBTI+ mugimenduaz.

Komunikabide nagusienen estigmatizazio saiakera ezberdinek zein manipulazioek, eskuin muturreko diskurtso intoleranteek eta gorroto jarrerek cisheteroarautik kanpo kokatzen diren bizitzak ezabatu nahi dituzten honetan, inoiz baino garrantzitsuagoa da nondik gatozen gogora ekartzea, ospatzea eta aldarrikatzea. Stonewalletik Euskal Herrira, milaka bizipen, galera, aldarrikapen eta lorpen izan ditugu, baina oraindik egiteko asko dugu. Eraso LGBT+fobikoen salaketen datuak esponentzialki egin dute gora azken urteetan, LGBTI+ pertsonen inbisibilizazio eta bazterketak presente jarraitzen du gure bizitzako arlo guztietan, diskurtso patologizatzaileak ugaritzen ari dira… eta ondorioz gure bizitzak arriskuan daude.

Honen guztiaren aurrean, antolatzea eta borrokatzea ezinbestekoa dugu. Gure kasuan, instituzioetatik politika publiko integral eta sendoak, perspektiba feministan oinarritutako zerbitzuak, babes kolektiborako eta autodefentsarako mekanismoak ezartzeko bideak… ezartzea ezinbestekoa dugu. Anekdotikoak diren politikak alde batera utzi, eta estrukturalak diren horiek erdigunean jartzeko garaia da. Horretan ari gara eta hori sustatzen jarraituko dugu, askoren artean eta elkarlanean.

Horregatik guztiagatik Ordiziako Udalean konpromisoa hartzen dugu, egin genuen gure herriko LGBTI+ pertsonen bizitzen gaineko diagnostikoa garatu, eta bertan ezarritako bi lan ildo garatzeko. Alde batetik, diagnostikoan oinarritutako ekintza plan integralak abiatzeko. Bestetik, gure herriko LGBTI+ komunitatearen memoria historikoa berreskuratzeko eta jasotzeko ikerketa abiatzea. Prozesu hauek, herriko LGBTI+ mugimenduko kideekin batera egiteko konpromisoa hartzen dugu eta erreferente nahiz norbanako ezberdinak aktibatzeko moduak sustatuko ditugu.

Honetaz gain, dei egiten dugu Ekainaren 28aren bueltan antolatu diren ekimen eta mobilizazioetan parte hartzeko. Ordiziak bere garaian hartutako konpromisoa berretsiko du, bere garaian ortzadarraren kolorez margotu zen Euskal Herria kalearen hasieran dagoen zebra-bidea berriro margotuz eta Jakes-etxean jarriko den kartel batean argi eta garbi adieraziz Ordiziak ez dituela eraso sexista nahiz LGBTI+fobikoak onartuko.

Amaitzeko, LGBTI+ pertsonen bizitzak egunerokotasunean bizigarriak izateko, lan eta borrokatzen ari diren kide eta kolektibo guztiak zoriondu nahi ditugu, harrotzeko moduko mugimendua osatzen dugulako.

Gora Ekainaren 28a

Gaur ekainaren 28an LGBTI+ harrotasunaren egunean, harro gaudela aldarrikatu nahi dugu. Ordiziako Udalak urteak daramatza gai honen inguruko kontzientzia lantzen, eta aurten ere, hainbat ekimen bultzatu ditu:

Udaberrian zehar, Udaberria Transloratzen zikloa aurrera eraman dugu laugarren urtez. Ordiziako Udalak duela lau urte hartu zuen ziklo hori martxan jartzeko konpromisoa, baina ez ekintza isolatu gisa, urtero gure agendetan presentzia izango duen sentsibilizazio eta formakuntza ekimen moduan baizik.

Ziklo horren bitartez, Trans errealitateari ikusgarritasuna emateaz haratago, gure gizartean isilduak izan diren kolektiboei ahotsa emateko konpromisoa hartu dugu urtez urte.

Harrotasunaren Egunaren harira, duela urte batzuk zebrabide honen bidez gaiari herrigunean ikusgarritasuna eman zitzaion bezala, aurten beste urrats bat eman nahi izan dugu, herrigunean eta modu ikusgarrian adieraziz, Ordizian ez dugula inolako erasorik onartzen, eta garbi azalduz eraso sexistask eta LGTBI+fobikoak gaitzesten ditugula.

Pauso eta ekimen hauek guztiak, lanketa konsziente baten barruan kokatzen ditugu. 2023. urtean Ordizian burututako LGTBI+ diagnostikoaren markoan, hain zuzen. Diagnostiko hartan, ordiziar ugari parte hartu zuten, eta ondorio ugari atera genituen.

Diagnosi horren bidez jaso genuen, besteak beste, herriko kaleetan LGTBI mugimenduaren ikusgarritasun falta somatzen zela, eta baita espazioaren okupazioaren inguruko hausnarketa bat ere.

Bide horretan, gaurkoa keinu txiki bat da. Baina, atzo Udalbatzaren osoko bilkuran onartutako adierazpenean azaldu genuen moduan, diagnostikotik ekintza planera pasatu behar da orain. Dagoeneko egiten diren ekintzak indartuz eta errotuz, izan Berdintasun sailetik kudeatzen ditugunak, Udaberria Transloratzen zikloaren baitakoak... baina baita, eta batez ere gainontzeko sailetan, begirada hau beti presente izanik eta gure eguneroko ekintzetan jarrera sexista eta LGTBIfobikoak ekidingo dituzten ekintza eta eskuhartzeak bideratuz.

Ordiziako Zuhaizti zentro sozialak aurten ere programa zabala osatu dute, eta gaur goizean egin dute horren aurkezpena. Bertan izan dira Jon Ander Caballero, Adinekoen Ongizate zinegotzia, Raquel Bravo, Zuhaiztiko juntako zuzendaria, eta Kristina Altuna, Berdintasun teknikaria.

“Aurten ere hemen gaude Zuhaiztiko programa aurkezteko. Adineko pertsonak aktibatu nahi ditugu, badakigulako oso garrantzitsua dela osasuntsu mantentzeko, bai fisikoki baita psikologikoki ere. Pandemiak ere erakutsi zigun zeinen onuragarria den aktiboki mantentzea, eta gure apustua adineko pertsonen ongizatea hobetzea da”, gehitu du.

Aktibatu zaitez! egitasmoa ordiziar heldu eta adineko guztiek (batez ere erretiratu eta pentsiodunek) parte hartzeko programa da.

Hiru ataletan banatu dira ekintzak: Kultur ekimenak eta jarduera fisikoa, eta Gente 3.0 Programaren baitan, La Caixa Fundazioarekin elkarlanean, Informatika eta komunikazioa, eta Osasuna eta Ongizatea.

Lehen zatian honako ikastaroak eskainiko dira: adimena lantzen, Euskara Eskola, Jarduera Fisiko Lasaia, Pilates, Erlaxazioa, Eskulanak, aretoko dantzak eta abesbatza. Azken atalean, bestalde, La Caixa banku-fundazioaren eta Ordiziako Udalaren arteko hitzarmenari esker, beste hiru ekintza antolatu dira.

Informatika eta komunikazioari dagokionez, Tailer horietan teknologia berrien egunerokotasunean aplikatzeko oinarrizko tresnak eta tresna aurreratuak eskaintzen dira, eta formazio ibilbide jarraia izango da. Hala, sare sozialak, bideo deiak, Whatsapp eta Facebooken sakonduko da. Horrez gain, Internet bidez tramiteak egiteko eman beharreko pausuak ere zehaztuko dira.

Osasuna eta Ongizateari dagokionean, Taldean partekatzen dira eguneroko bizitzarako ezagutzak, esperientzia, estrategiak eta tresna praktikoak (ohitura osasuntsuak, teknika eta trebetasun psiko-emozionalak eta komunikaziokoak, eskubideen defentsa...), eta bizitza pertsonaleko proiektu atsegina eta motibatua sustatzen da.

Horrez gain, lagunen arteko irakurketa tailerra ere emango da. Irakurketaren inguruko topaketa, solasaldian esperientziak eta begiradak partekatuz.

Parte hartzeko deia

Caballerok herritarrak ekintza hauetan parte hartzera animatzen ditu. “Ikusten duzuen moduan eskaintza zabala dugu, eta beraz, badago non aukeratu. Bertan parte hartzeko gonbitea luzatzen diet ordiziarrei, izan ere, ekintza hauetan ziur asko ikasteko aukera izango dutela”. Izen ematea zabalik egongo da irailean, urriaren 9a arte: Zuhaizti Gizarte Zentroa: 657 791 813 / 943 88 92 88, edo bestela 688 822 329 telefonoan.

Goazen Ordizia-ren ikasturte amaierako festa ospatu genuen ostegun goizean. Irailean, indartsu bueltatuko da berriz ere ekimena.