Gaur goiz osoan zehar Goazen Ordiziako Olinpiadak jokatu dira. Toka, giza proba, erreleboak... hamaika jolas egin dira eguraldi eta giro paregabearekin. Talde hori, gorri, berde eta urdinetan banatuta, bakoitzak haren taldeko biserak jarrita egin ditu probak. Amaieran, bisera horiek jaso eta Afrikako Kellesensa eta Yoire Gobernuz Kanpoko Erakundeei bideratuko zaizkie. Hemen eguneko argazkiak: 

Bihar ospatuko ditugu Goazen Ordiziako Olinpiadak. Hirugarren edizioa izango da aurtengoa. Ekintza bera 10:30ean hasiko da baina parte hartzaileak 10:20rako Zuhaizti parean elkartuko dira.

Guztira lau talde izango dira:

• Berdea: Zuhaizti, Udala, Garagune eta 12 ikasle.
• Urdina: Osakidetza eta Osasun Publikoa, 12 ikasle eta Eguneko zentroa.
• Gorria: Kimetz, 12 ikasle, eguneko zentroa eta Goazen.
• Horia: Nagusilan, 12 ikasle eta Goazen.

Talde bakoitzean 12 ikasle inguru egongo dira, 6 Oiangurenekoak eta beste 6 Jakintzakoak. Jokoei dagokionean, toka, igela, erreleboak, zaku lasterketa, giza proba, zinta jolasa eta pañueloarena izango dira. Gainera, taldeko koloreko biserak eramango dituzte parte hartzaile guztiek.

Iraupenari erreparatuz, 12:00ak aldera amaituko dira Olinpiadak.

Egunotan Gipuzkoako erresidentziak eta eguneko zentroak aldarrikapenak eta greba egiten ari dira, eta gaur goizean Ordiziako Udaleko alkateak, Adur Ezenarrok, harrera egin die plazan. Helarazi dituzten eskaerak entzun ostean, Ordiziako Udalak herriko egoitzako egoera hobetzeko "ahal duen guztia" egingo duela hitzeman du, bertan dauden adineko pertsonen kalitatezko zaintza bermatze aldera, langileen lan baldintzak hobetzeko asmoz. 

Atzo arratsaldean Zuhaizti zentroan Alzheimerraren hamaika aurpegiak azaleratu zituen Afagi, Gipuzkoako Alzheimerraren elkarteak. Aretoa entzulez bete zen Naroa Diaz eta Begoña Rodriguezen azalpenak entzuteko. Tabuak alde batera utzi eta errealitatea mahai gainean jarri zuten.