Ordiziako Zuhaizti zentro sozialak aurten ere programa zabala osatu dute, eta gaur goizean egin dute horren aurkezpena. Bertan izan dira Ainhoa Jimenez, Ongizate zinegotzia, Raquel Bravo, Zuhaiztiko juntako zuzendaria, eta Odilo Rivela, Majori kiroldegiko gerentea.

“Iazko moduan, aurten ere hemen gaude Zuhaiztiko programa aurkezteko. Dudarik gabe, pandemiak ere erakutsi digan zerbait izan da ezinbestekoa dela adineko pertsonei zuzendutako ekintzak antolatzea. Gure adinekoak osasuntsu mantentzeko, bai fisikoki eta baita psikologikoki ere. Horren adibide da aurkezten ari garen programa, baina baita ere, esaterako, joan den astean berriz ikasturtea hasi zuen Goazen Ordizia ekimena ere”, azaldu du Ainhoa Jimenez, zinegotziak.

COVID garaian ere, aktibatu zaitez! egitasmoaren barruan, ordiziar heldu eta adineko guztiek (batez ere erretiratu eta pentsiodunek) parte hartzeko programa da aurkeztu dena. Kontuan izan behar da egungo egoera eta aldaketak eragin ditzakela antolatuko diren ekintzetan. Hala ere, halakorik gertatuko balitz, jakinaraziko da.

Hiru ataletan banatu dira ekintzak: Kultur ekimenak eta jarduera fisikoa, eta Gente 3.0 Programaren baitan, La Caixa Fundazioarekin elkarlanean, Informatika eta komunikazioa, eta Osasuna eta Ongizatea.

Lehen zatian honako ikastaroak eskainiko dira: adimena lantzen, Euskara Eskola, Jarduera Fisiko Lasaia, Pilates, Jarduera Fisikoak Kiroldegian (hau Majorin garatuko da, eta bertan izena eman beharko da), eta Erlaxazioa.

Azken atalean, bestalde, La Caixa banku-fundazioaren eta Ordiziako Udalaren arteko hitzarmenari esker, beste hiru ekintza antolatu dira.

Informatika eta komunikazioari dagokionez, Tailer horietan teknologia berrien egunerokotasunean aplikatzeko oinarrizko tresnak eta tresna aurreratuak eskaintzen dira, eta formazio ibilbide jarraia izango da. Hala, sare sozialak, bideo deiak, Whatsapp eta Facebooken sakonduko da. Horrez gain, Internet bidez tramiteak egiteko eman beharreko pausuak ere zehaztuko dira.

Osasuna eta Ongizateari dagokionean, Topaketak eta tailerrak egingo dira, Taldean partekatzen dira eguneroko bizitzarako ezagutzak, esperientzia, estrategiak eta tresna praktikoak (ohitura osasuntsuak, teknika eta trebetasun psiko-emozionalak eta komunikaziokoak, eskubideen defentsa...), eta bizitza pertsonaleko proiektu atsegina eta motibatua sustatzen da.

Horrez gain, lagunen arteko irakurketa tailerra ere emango da. Irakurketaren inguruko topaketa, solasaldian esperientziak eta begiradak partekatuz.

Parte hartzeko deia

Jimenezek herritarrak ekintza hauetan parte hartzera animatzen ditu. “Tailer asko daude mota ezberdinetakoak, eta horrek eskaintza zabala jartzen du herritarren eskura. Bertan parte hartzeko gonbitea luzatzen diet ordiziarrei, izan ere, ekintza hauetan ziur asko ikasteko aukera izango dutela”. Izen ematea zabalik egongo da irailean eta urrian zehar: Zuhaizti Gizarte Zentroa: 657 791 813 / 943 88 92 88, edo bestela 688 822 329 telefonoan.

Martxan da berriz ere Goazen Ordizia ekimena. Gaur goizean, partaideak gogotsu atera dira herrian barrena ibilbidea egitera.
Ostegunero, goizeko 10:30etan, Udaletxetik abiatuko dira.

Ostiral honetan, irailak 24, Ordiziako Boluntariotzaren azoka egingo da Plaza Nagusian. 17:30etik 20:00etara. Sarrera librea eta irekia izango da herritar guztientzat, eta segurtasun neurriak bermatuko dira.

2021eko Boluntariotza Azokaren bi helburu nagusiak azaldu ditu Ainhoa Jimenez, hezkuntza zinegotziak: “alde batetik, Ordizian boluntariotzaren arloan lan egiten duten erakundeak eta elkarteak ikusaraztea eta haiei buruzko informazioa ematea eta egiten dituzten jarduerak eta, bestetik, boluntario berriak erakartzea”. Gainera, esker hitzak ere adierazi ditu: “izugarrizko lana egiten dute Ordizian boluntariotza eskaintzen duten talde eta elkarteek. Horiei gure aldetik eskerrik beroenak adierazten dizkiegu, izan ere, askotan isileko lana bada ere, behar beharrezkoa da”. Horrez gain, ordiziarrei gogorarazi die elkarte hauek lanean aritzen direla, eta nolabaiteko zalantza edo laguntza behar izanez gero, horiengana jo dezaketela.

2021eko edizio honetan gizartearen eta osasunaren arloko irabazi-asmorik gabeko 16 erakundek hartuko dute parte, besteak beste:

1. Alzheimerra duten gaixoen familien eta lagunen Gipuzkoako AFAGI elkartea

2. FIARE - Banka Etikoaren proiektuaren babesleen elkarteak

3. Crohn eta ultzeradun kolitisa dutenen ACCU elkartea

4. Minbiziaren aurkako AECC elkartea

5. Gurutze gorria- CRUZ ROJA

6. DYA Gipuzkoa

7. Katxalin Gipuzkoako Bularreko eta Ginekologiako Minbiziak Kaltetutako Emakumeen Elkartea

8. Ordiziako Emakumeen Kimetz elkartea

9. Lagunkiro Elkartea

10. Desjabetzeak Stop plataforma

11. BAKERAKO LANKIDETZA BATZARRA

12. ODOL EMAILEAK

13. KARITAS

14. EKINTZA BIBE (Bizi berria) Gipuzkoako ludopatia eta mendetasun psikologikoen errehabilitazio elkartea

15. Gipuzkoako “Divina”  Emakume nigeriaren kultur elkartea

16. Gainditzen

Azoka egungo egoerara egokitu da, prebentzio-neurri guztiekin (maskararen, gel hidroalkoholikoaren eta edukieraren kontrolaren nahitaezko erabilera). Aurrekoetan bezala, erakunde bakoitzak egiten dituzten jarduerei buruzko stand bat jarriko du. Aurten ezin izan dute bestelako jarduera osagarririk planteatu; beraz, urtean zehar, Udalak hainbat jarduera garatuko ditu elkarte horiekin, sentsibilizazio-kanpainak (hitzaldiak, tailerrak), parte hartzen duten erakundeek egiten duten lanari zabalkunde handiagoa emateko.

Datorren ostegunean, irailak 23, hasiko da berriz ere Goazen ordizia Ekimena martxan. Ostegunero, goizeko 10:30etan abiatuko dira partaideak Udaletxe azpitik, herrian barrena ibilbidea egiteko asmoz. Doakoa da ibilbidea eta interesa dutenek Gizarte Ongizatean, 943 80 56 10 telefonora deituz edo emailez Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. eman dezakete izena.

Programa honen helburu garrantzitsuenak parte-hartzaileen sozializazioa eta osasuna hobetzea dira. Lortu nahi dena honako da:  - Bereziki, baino ez esklusiboki, 64 urtetik gorako pertsonen ongizate fisiko eta mentala hobetzea, horretarako taldeko ibilbideak sustatuz.

- Beste zenbait eremu ere landu nahi izan dira, izaterako, hainbat sektoreen parte hartzea eta gizarteratzea bultzatzea, kohesio soziala areagotuz. Gainera, belaunaldien arteko harremanak ere landu nahi dira, eta gazte zein helduentzako zuzenduta dago.

“Ordizian ditugun adineko pertsonak ahalik eta osasuntsuen egotea lortzea da gure helburua. Goazen Ordizia ekimena berriz ere martxan jartzea garrantzitsua dela deritzogu, eta horregatik lanean aritu gara azken hilabeteetan guztia ondo prestatzeko”, zehaztu du Ainhoa Jimenez, Ongizate zinegotziak. Ekimenaren abantailez ere mintzatu da zinegotzia: “sozializatzea adin guztietan da garrantzitsua, eta adineko pertsonen artean ere bai. Orain arteko esperientziek erakutsi digute onura ugari ekartzen dizkiela, eta hala dela baieztatzeko aukera izan dugu. Horregatik dei egiten diegu herritarrei Goazen Ordizian parte hartzeko, ondo pasako dutelako, gorputza eta adimena martxan jarriz”. Horrez gain, belaunaldien arteko konexioak sortzen direla ere gailendu du Jimenezek: “partaideek behar duten laguntza guztia jasoko dute boluntarioen aldetik. Gainera, astero gonbidatu bereziek egiten dute bat ekimenarekin; hala nola, ikastetxeek, Gurutze Gorriak, eta bestelako elkarteek. Horrek ere aniztasuna ekartzen du herrira, eta aberastu egiten gaitu pertsona moduan”.

Ekintza honek onura asko dakartza. Aldi berean, ariketa fisikoa egiteko laguntza edo motibazioa behar dutenen artean parte hartzea bultzatzea lortzen da, eta harremanak hobetzen dira, ibilaldiak elkartzeko puntu bilakatzen dira; beste era batera balitz, ez litzateke harremanik sortuko beraien artean. Parte-hartzaile guztien beharretara eta posibilitateetara egokitutako ibilbideak  dira.

Proiektua burutzea ahalbidetu duen taldean herritarren, instituzioen eta errekurtso teknikoen ordezkariak daude eta, zehazki, ondorengoak parte hartu duten eragileak hauek izan dira: Ordiziako Udala (Kirol eta Gizarte Ongizate Sailak), Osasun zentroa eta Eusko Jaurlaritzako Osasun saila, Zuhaizti gizarte zentroa, Lagunkiro elkartea, Kimetz, Garagune, Ordizia Kolore, Ordiziako ikastetxeak eta Eguneko zentroa.

Nola garatzen da ekimena?

Herriko bolondresen laguntzarekin. Etxetik irteteko zailtasuna duten pertsonei laguntza berezia ematen zaie; beharrezkoa bada etxera joango zaie bila, eta gurpildun autoaren erabilera beharko balu norbaitek, hori ere eskura jarriko zaie.

Kontuan izan behar da hiru ibilbide daudela aukeran: partehartzaile guztiak eroso eta beraien ahalmenen baitan parte hartzeko aukera izango dute modu honetan.

Eguraldi txarra egingo balu, bestalde, ariketa fisikoa egiteko beste aukera batzuk jarriko dira eskuragarri.

Dudarik gabe, egungo egoerara egokitutako protokoloa martxan jarrita itzuliko da Goazen Ordizia: hala nola, maskara, gela, eta segurtasun distantziak, besteak beste.