Liburu Baby Kluba ostegunean egingo da, urtarrilak 12, Udal Liburutegian goizeko 10:30etan. Hurrengo urtarrileko saioa 19an izango da, 17:00etan.

Liburu Baby Kluba 0 eta 3 urte bitarteko umeei zuzenduriko jarduera ludiko eta didaktikoa da. Umeak heldu batekin egongo dira eta azken honek jardueran ere parte hartuko du. Jarduaren ardatza eta abiapuntua liburua da. Jarduera honen helburu nagusia umeengan txikitatik eta beraien familiengan literatura, musika, artea eta naturarekiko interesa piztea da. Liburu Baby Kluba jarduera kulturanitza da eta horregatik, euskaraz, gazteleraz eta ingelesez garatzen da.

Komeni da izena ematea Liburutegia bertan edo 943805633 telefonoan  edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. posta elektronikoan.

"Aurten ere, oso pozik gaude Antzerki Garaia programa aurkezteko aukera dugulako. Beste behin, punta puntako antzerkiak ekarriko ditugu Beasain eta Ordiziara, eta publikoak horietaz gozatzeko aukera izango du", zehaztu du Adur Ezenarro, Ordiziako alkateak. Urtarrilarekin batera Ordiziako Herri Antzokiak eta Beasaingo Usurbe antzokiak euren ateak zabalduko dizkie “Antzerki Garaia” programazioari. Egitarau hau Beasain eta Ordiziako Udaletako Kultura Sailek bultzatu eta antolatu dute, Gipuzkoako Foru Aldundiaren eta Euskadiko Antzerki Sarearen lankidetzarekin. Emanaldi guztiak 20:30etan izango dira.

Antzerki garaia programazioak 1995eko lehen hiruhilekoan eman zituen lehenengo urratsak; beraz, aurtengoa Goierriko antzerki-denboralditxoaren hogeita bederatzigarren ekitaldia da. Aurtengo denboraldia ere maila altuko antzerki eta obrez osatu da. Urtetik urtera abonatuen kopuruak gora egiten du eta jasotzen den erantzuna ikusita, Udalen arteko lankidetzak aurrera egiteko asmo irmoa du. Beti ere, euskal antzerki eta bertako lanen mesedetan. Udalen arteko lankidetza honi esker, euskarazko antzerki eskaintzatik 6 obrako lagin bat aurkezten da, baita gaztelerazko pare bat ere.

Programazioa

Beasaingo Usurbe Antzokian zabalduko da 2023ko “Antzerki garaia” programazioa. Lehen emanaldian, urtarrilaren 13an, Txalo produkzioak konpainiaren eskutik “Sagastitarrak” obra izango da ikusgai. Urtarrilaren 20an berriz, “La casa de papel” telesailaren arrakastaren ondotik, Itziar Ituño eta Ramon Agirre etorriko dira Ordiziara, “Hobe ixilik” antzezlanarekin. Otsailaren 17an “Ez naiz inoiz Dublinen izan” lanarekin etorriko dira Usurbera Aitziber Garmendia goierritarra eta beste zenbait aktore, Tentazioa konpainiaren eskutik. Hurrengo astean berriz, Ados Teatroak konpainiak “Muchos amigos negros” antzeztuko du Herri Antzokian. Martxoko lanak honakoak izango dira: 17an Ordizian Hika Teatroak “Toto” aurkeztuko du eta 24an Beasainen “Cabezas de cartel” Perigallo teatroak. Apirilean eta aurtengo antzerki garaiaren zikloa itxiz, 14an Beasainen “Yerma” lana izango da “La dramática errante”k aurkeztuta eta 21an Vaiven produkzioak-en urteurrenean, “Familia Sarekada” lana ekarriko dute Ordiziara.

Sarrerak eta abonuak

Egitaraua Ordiziako  eta Beasaingo etxeetan banatuko da. Emanaldi bakoitzerako sarrerak 12 euroan izango dira. Ziklo osorako abonua ere lortu daiteke, 72 eurotan.  Sarrerak, emanaldia egin behar den antzokiaren leihatilan lortu ahal izango dira, baita Kutxabank sarrerak zerbitzuen bidez.

Badago baita talde-sarrerak eskuratzeko aukera eta horrela 10 sarrera baino gehiago eskuratu nahi dituzten kultura talde, ikastetxe eta gisakoek, sarrera-prezio berezia izango dute: 10€ sarrerako.  Taldeko sarrerak lortzeko, dagokion Udaleko Kultura Sailean aldez aurretik jakinarazi beharko da.

Glu Gluk Katu botaduna-ren bertsio berritua proposatzen du, non maitagarrien ipuin klasikoaren berezko abentura eta desabantailez gain, gainditzeko gaitasunaren, iraunkortasunaren eta adimenaren garrantzia eta aukera izugarriak transmitituko diren, baita belaunaldi ezberdinen arteko kultur transmisioaren balio izugarria ere. Bertsio berritu eta eguneratu honetarako, Glu Glu taldearen oinarrizko ahalegina den bezala, maitagarrien ipuinen elementu sexistek ez dute lekurik izango.

Amona batek errota zaharreko trasteak banatuko ditu iloben artean herentzia gisa eta proba modura: umeetako bakoitzak gazteluko ateak irekitzea lortu beharko du jaso duen elementuaz baliatuta. Gazteluak aspaldi galdu zuen magia. Amonak ez du bere ilobek magia galtzerik
nahi eta jolas honekin iloben irudimena eta kemena piztuko ditu. Amonak dioen moduan, ezina ekinez egina!

Abrakuk, iloba gazteenak, jasotako bota zaharrei esker ezagutuko du katua, Botadun Katua. Elkarrekin ipuin zaharrak eta tradizioak jasoko dituzte herri inguruan. Arbasoen ondare kulturala eta ohiturak jasoko dituzte. Kultura-transmisioaren magiak, beharbada, gazteluko ateak irekiko ditu berriz.

Charles Perraultek jasotako “Botadun Katua” ipuin klasikoaren moldaketa honetan, kantu eta dantzaz betetako antzezlan komikoaz gozatzeko aukera izango da. Abentura eta jolasen bidez, ikusleak ipuin zaharren berreskuratze lanaren parte izango dira, denok elkarrekin, ipuin klasikoei merezi duten omenaldia egiteko.

Gazteluko ateak zabalduta eta magia berreskuratuta, sekulako festa ospatuko dute amamak eta ilobek gazteluan. Gainera, gazteluko festan gorrazarre egingo diete ipuin, kantu eta margo zaharrei. Lanaren eta konstantziaren aldeko ospakizuna izango da, baita inoiz ahanzturan galdu behar ez diren gertaerena ere.

Antzezleak: Andrea Covadonga, Sara Barroeta, Jon Casamayor, Sandra Fernández Aguirre izango dira eta ikuskizuna euskaraz izango da.

Duela bi urte bere aita Mikel Markezekin batera “Azalberritzen” diskoa argitaratu ondotik, Esti Markezek bakarkako bideari ekin dio. “Hitzekin jolasean” izena jarri dio bere bigarren lanari eta ostegun honetan, hilak 15, arratsaldeko 19:30etan Ordiziako Herri Antzokian aurkeztuko du.

Aurten bakarkako ibilbideari ekingo dion arren, Esti Markezek betidanik izan du musikarekin harreman estua. Txikitatik izan du musikarako grina, etxean eta familian orduak ematen zituen kantari, bigarren eta hirugarren ahotsak bilatzen. 2020ko konfinamenduan, etxean igarotako ordu haiek zukutu eta orduan sartu zen sorkuntzaren munduan. Kantuak sortzen hasi zen eta, urte berean, bere aita Mikel Markezekin batera «Azal berritzen» (AutoEkoizpena, 2020) diskoa argitaratu zuen.

Osasun-larrialdiak, diagnosi irudia eta medikuntza nuklear ikasketak burutu ondoren, Estik musika eta osasun-arloko bere egungo lana uztartzen ditu. Abestiak, dira bere sendagaia. Haiekin lotuta eta aldi berean aske sentitzen da. Sentsazio horiek guztiak eta musikarekiko duen maitasuna, noski, islatuko ditu bakarka gidatzen hasi berri den eta indartsu datorren proiektu honetan.

Pandemia garaian Euskal Herrian zehar kontzertuak eskaintzen aritu da, bere aita Mikel Markel, Arkaitz Miner eta Julen Alonso musikariekin batera. Oraingo honetan, taldea eraberrituta dator eta Estirekin batera honako artistak izango dira oholtza gainean; Iker Lauroba gitarran, Dánae Riaño baxuan eta Josu Erviti baterian. Azaroan Aian eskaini zuen bigarren disko honen aurkezpen kontzertua eta probalekuan izandako harreraren ondoren, Ordiziako Herri Antzokikoa izango da egiten duen bigarren plaza.

Sarrerak aurrez Barrena Kultur etxean (09:00-13:00 eta 16:30-20:00) eta egunean bertan, Herri Antzokiko lehiatilan eskuratu daitezke.

Irailetik hasita lau kontzertu ederrez osatutako ziklo honetan punta puntako artistak izan dira Herri Antzokiko oholtzan. Irailean Korrontzi, Urrian Flamenco etxea, Azaroan Peio Ramirez eta Nacho Soto, eta osteguneko kontzertu honekin itxiera emango zaio aurtengo Bizi Musika zikloari.