Ostegun honetan, hilak 13, Ordiziako Udalak antolatutako Bizi Musika zikloak “Flamenco etxea 2” kontzertua aurkeztuko du Herri Antzokian 19:30etatik aurrera.

Gorka Hermosa soinujolearen urretxuarra eta José Luis Montón flamencoko gitarra-jolearen “Flamenco etxea 2” proposamen originala  aurkeztuko dute, Mariana Collado dantzariak lagunduta. José Luis Montón eta Gorka Hermosak flamenkoaren eta euskal musikaren arteko fusio bitxi eta originala proposatzen digute, beren konposizioetatik hasi eta euskal gai tradizionaletaraino doana. “Flamenco etxea” duela hamaika urte argitaratu zuten eta arrakasta izan zuen. Mundu osoko aretoetan jo zuten eta kritika bikainak jaso zituzten. Oraingo honetan ere flamenkoaren eta euskal kulturaren arteko fusio originala egin dute, maila goreneko kolaborazioekin.

Luxuzko hirukote honek unibertso magiko batera garamatza. Montón euskal gai tradizionalei eta konposizio propioei bere flamenko ikutu pertsonala ematen die, eta melodia hauek Gorka Hermosaren akordeoiaren konposizio eta akordeen artean bidaiatzen dute.

Gorka Hermosak bere instrumentua irauli du, 4 aldiz urteko akordeoirako konposizio onenaren saria jaso du CMA (Soinujoleen Munduko Konfederazioa) erakundeagatik. 2019. urtean New Yorkeko Accordion Stars aldizkariaren makroinkesta batean munduko 10 akordeoi jotzaile hoberenen artean hautatu zuten, 126 herrialdetako 27.000 pertsonek parte-hartutako inkesta batean. Era berean, CIA-IMC UNESCO Konposizio Saria irabazitakoa da 2013. urtean, baita Soinujoleen Munduko Elkarteak ematen duen urteroko konposizio onenaren saria bereganatu ere. Akordeoilari gisa mundu osoan hainbat kontzertu eskaini izan ditu: Txinaz gain, Iranen, Errusian, Amerikan eta Europako herrialde gehienetan musika emanaldiak atondu dituelarik.

José Luis Montón flamenkoaren historiako gitarra-jotzaile handienetako eta originalenetako bat da. Munduko world music disketxe garrantzitsuenarekin (ECM) disko bat grabatu duen estatuko musikari bakarra da. José Luis Montónen musika-proiektuek Flamenkoari begirada argia ematen diote beti, bere konposizioetan distira eta gitarraren ezagutza bikaina uztartuz. Bere musikak, beti kolorez beterik, bihotza, edertasuna eta erritmoen ezagutza biltzen ditu, ez bakarrik flamenkoak, baita arimarenak ere.

Hermosa eta Montonekin batera Mariana Collado dantzaria arituko da. Interprete  eta koreografoa izateaz gain, artista gonbidatua da nazioko eta nazioarteko jaialdi askotan.

Sarrerak aldez aurretik salgai Barrena Kultur Etxean eta ostegunean bertan Herri Antzokian.

KULTURA FAMILIAN BIZI izenburupean lau ikuskizun proposatzen dituen familientzako jardueren programa martxan jarri da berriro ere. Ikuskizun horiek Herri Antzokian eskainiko dira, igandetan goizeko 12:30ean.

Familia askok transmititu nahi diete beren seme-alabei kulturarekiko zaletasuna oro har: literatura, pintura, zinema, antzerkia, eskultura, argazkilaritza... KULTURA FAMILIAN BIZI programak horretarako pista batzuk eskaintzen ditu,  pailazoak, txotxongiloak eta haur literaturako klasiko baten bertsio moderno bat eskainiko dituen ziklo batean.

Zikloa datorren urriaren 9an, igandea, hasiko da goizeko emankizunean, eguerdiko 12:30etan, Patxin eta Potxin pailazoek “Baserrian” proposamen berria aurkeztuko dute.  Potxin Patxin artistak baserrira egun pasa doaz eta bide batez ikusleak ere bertan senti arazi nahi dituzte, une oro erne eta adi egongo da ikuslea, mendi, baso, zelaiek ematen digutenarekin ondo pasatuz ikastea du helburu saio honek.  Animalien lagun izaten eta pakean uztearen garrantzia ikasiko dugu. Eta jolastuz baserriko eginkizunetan parte hartuko dugu.

Azaroan zikloko bi emanaldi aurkeztuko dira, lehena hilaren 6an (12:30), Kiki, Koko eta Moko pailazoen “Tintxilintxin bakea egin” emanaldiarekin. Kiki pailazo jolastia dugu, Koko alaia eta Moko inozoa. Pertsonai hauek esketx ezberdinak aurkezten dituzte emanaldiaren arabera, zirkoko teknika-mota desberdinez baliatuz: monozikloa, joku malabarak, mazak, pilotak eta diaboloak besteak beste. Guzti hau musikaz alaitua eta partaidetza bultzatzen duten jolas eta dantzekin lotuz.

Azaroaren 20an, Tolosako Txotxongilo Jaialdiaren eskutik, birziklatzeko materialarekin egindako “Robot” ikuskizuna dator. Ikuskizun berezia da, Txileko eta Poloniako koprodukzio honek David Zuazola (Santiago) eta Unia Teatr Niemozliwy (Varsovia) elkartu baititu. Varsovia hirian 18 hilabetez lan egin ondoren, zentzu artistiko sakoneko xehetasunez beteriko ikuskizun bat jaio da, istorio sinplea baina esanahiz betea kontatzen duena.

Eta zikloa abenduaren 18an itxiko du, Glu-Glu Producciones konpainiaren eskutik datorren « Botadun katua » klasikoaren bertsio originala, Perrault idazlearen klasikoaren bertsio dibertigarria eskainiz.

Ziklo honetarako sarrerak Barrena Kultur Etxean eskura daitezke 5 €-ko saioko prezioan eta ziklo osorako abonua eskuratzeko aukera eskaintzen da 12 €-ko prezioan (4 ikuskizun). Familian kulturaren magiaz gozatzeko aukera paregabea.

Oporraldiaren ondoren, Liburu Baby Kluba ipuin-kontalariaren programari ekingo zaio berriro. Saioa Udal Liburutegian egingo da,  ostegunean goizeko 10:30etan.

Liburu baby kluba Udal Liburutegiak sustatzen du eta urtean zehar Liburutegi berak bultzatzen duen ipuinkontaketen saioei gehitzen zaio.

Liburu Baby Kluba 0 eta 3 urte bitarteko umeei zuzenduriko jarduera ludiko eta didaktikoa da. Umeak heldu batekin egongo dira eta azken honek jardueran ere parte hartuko du. Jarduaren ardatza eta abiapuntua liburua da. Jarduera honen helburu nagusia umeengan txikitatik eta beraien familiengan literatura, musika, artea eta naturarekiko interesa piztea da. Liburu Baby Kluba jarduera kulturanitza da eta horregatik, euskaraz, gazteleraz eta ingelesez garatzen da.

Parte hartzaileen kopurua mugatua izanik, komeni da izena ematea Liburutegia bertan edo  943805633 telefonoan  edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. posta elektronikoan

Euskal Jaiak igaro ondoren, urteko azken lauhilekoak ekitaldiz vetea datozkigu. Iraileko lehen hamabostaldi honetan egin diren ekintzen ondoren, Herri Antzokira itzuliko da "Bizi Musika" kontzertu-zikloa, bere hirugarren edizioa aurkezten duena, euskal musikariekin, publiko guztiarentzako kontzertuekin eta musika estilo ezberdinekin. Emanaldiak ostegunetan eta arratsaldeko 19:30ean izango dira.

Irailaren 22an irekiko du zikloa Agus Barandiaran trikitilaria buru duen "Korrontzi" folk taldeak. “Korrontzi” inor axolagabe uzten ez duen euskal musika taldea da, kultura oso bateko erakusleiho bat, beraien zuzenekoen indarra eta energiarekin antzinateko soinuak eta dantzak edo folkaren joera berriak transmititzen dituena. “Korrontzi” euskal musika eta dantza tradizionalaren jai bat da, abangoardiako ikuspuntu batekin. Euskal Herriko kolore eta paisaiak.

Ondoren, urriaren 13an, Gorka Hermosa soinujolearen eta José Luis Montón gitarra-jolearen proposamen originala etorriko da, “Flamenco Etxea 2” aurkeztuko dute, Mariana Collado dantzariak lagunduta. José Luis Montón eta Gorka Hermosak flamenkoaren eta euskal musikaren arteko fusio bitxi eta originala proposatzen digute, beren konposizioetatik hasi eta euskal gai tradizionaletaraino doana. José Luis Montón flamenkoaren historiako gitarra-jotzaile handienetako eta originalenetako bat da. Munduko world music disketxe garrantzitsuenarekin (ECM) disko bat grabatu duen estatuko musikari bakarra da. Gorka Hermosak bere instrumentua irauli du, 4 aldiz urteko akordeoirako konposizio onenaren saria jaso du CMA (Soinujoleen Munduko Konfederazioa) erakundeagatik.

Azaroaren 17an Pello Ramirez artista ordiziarrak, Nacho Sotok pianoarekin lagunduta, "Haize Oihalak" aurkeztuko digu. Pello Ramirez akordeoi zein violoncello jotzailea, gure musikaren eskenako musikaririk estimatu eta errekerituenetakoa izateaz gain (Benito Lertxundi, Niko Etxart, Pier Paul Berzaitz, Dulce Pontes, Olatz Zugasti, Mikel Urdangarin, Xabier Lete, Iñaki Salvador …) konposatzaile handia ere bada, zotila bezain dotorea, sakona bezain sujerikorra.

Eta abenduaren 15ean itxiko du zikloa Esti Markezen azken musika-proposamenak, Dánae Riaño (Baxua), Iker Lauroba (Gitarra) eta Josu Erviti (Bateria) lagunduta. Parekidetasuna: taldeko bi kide emakumeak dira eta bi gizonak. Ahalduntzea: orain arte Estiren garapena bere aitaren ondoan ikusi dugula eta orain indartsu dator horrelako proiektu ausartarekin. Taldeko bi kideren gaztetasunak eta freskotasunak (ESTI eta Danae) bat egiten dute beste bi kideen (Iker eta Josu) esperientzia eta ibilbide luzearekin, eta proiektu bakar eta desberdin bat sortzen dute, non bi aldeen indarguneak nabarmenak diren. Horrek publiko zabal batetara iristea ahalbidetuko du.

Iaz bezala, lau kontzertuetarako abonu bat jarri da salgai, 28 euroan, eta sarrera solteak 10 euroan izango dira. Abonuak Barrena Kultur Etxean eta Herri Antzokian (leihatilan)  eros daitezke eta sarrera solteak Barrenan.