Ostiral honetan, 'eRRe, aldarri bat bertsoz' ikuskizuna eskainiko da Herri Antzokian, 19:30ean. Doakoa izango da eta sarrerak Antzokiko lehiatilan jaso daitezke. Udaberria Transloratzen Ordizia Transformatzen zikloaren baitan kokatzen da saio hau.

Ahoz Aho, Ahozkotasunaren Jaialdia azken txanpan sartzen da aste honetan. Pasa den larunbatean Maider Alcelay eta Nicolas Buenaventura kolonbiarrak saio liluragarria eta ariña eskaini zuten Barrena Jauregian eta ondoren, kalean, Ituiño, Blanco eta Calavia magoek jendeak sorgindu zituzten beren hurbileko magiarekin eta asteartean Mireia Delgadok kontatu zituen bere istoriak Barrenan.

Eta Ostegun honetan, hilaren 24an, Ordiziako Barrena Kultur Etxean, arratsaldeko 19:00etan,  Ahoz-Aho Jaialdiaren Ikuskizun nagusia ospatuko da, Narrazio Lehiaketa finalarekin batera.

Ipuin eta istorioen berotasunak bildu egin gaitu, Ahozkotasunaren Nazioarteko Jaialdiaren edizio berri honetan; narrazioaren irakasleek ilusioaren garra piztu dute gure baitan,  hitzaren Akelarrea antolatuko da, hau da, Ahozkotasunaren Jaialdi Nagusia. Barrena Jauregia izango da gure akelarrearen kobazuloa eta hitzordua esan dugun bezala ostegunean izango da, 19:00etan. 

Gaueko sua Ahozko Kontakizunen X. Lehiaketako hiru finalistek piztuko dute: Imanol Arabaolaza (Tolosa), Vanessa González (Arrasate) eta Monika Arratibel (Etxarri Aranatz) saioa amaitzean aurtengo edizioaren irabazlea zein izan den jakingo dugu.

Istorioek eta ipuinek sorginduko gaituzte, ez dugu edari magikoen beharrik izango. Narrazioaren aztiak gonbidatu ditugu horretarako:   Ifigeneia Kakridoni  (Grezia), Tarana Karim  (Azerbaijan) eta Iñaki Carretero, Maider Alcelay eta May Gorostiaga Euskal Herriko narratzaileak

Eta Jaialdia bukatzeko ostiralean,  arratsaldeko 17:30etatik aurrera Barrenan izango dugu saio familiarra,  Ifigeneia Kakridoni (Grezia) eta Ester Povedarekin (Euskadi-Valencia) narratzailekin.

Greziatik zuzenean heldutako Ifigenia Kakridoni kontalari, musikari eta hezitzaileak, kultura helenikoaren ordezkari gisa arituko denak, jainkoen eta hilkorren arteko patuaren jokoetara hurbilduko gaitu. Kakridoni musika-hezkuntzan aditua da. Duela hainbat urte ahozko narrazioa deskubritu zuen,  musikarekiko, tradizioarekiko eta hitzarekiko zuen pasioa konbinatzeko moduko artea. 2008tik, hitzaren artea kontatzen eta aztertzen du, bere jaioterrian eta munduko beste hiri batzuetan. Gitarra eta instrumentu txikiak lagun dituela kontatzen du. Paramythokores (Ipuinen alabak) taldeko hiru kideetako bat da.

Ester Poveda gaztetatik hasi zen antzerkia egiten. Hasieran ikastetxeko taldean zegoen, baina institutua bukatzean jarraitu egin zuen, ikaskideekin talde amateurra osatuz. Elxen jaioa, Arte Dramatikoa ikasi zuen Murtzian eta, ondoren, antzerkia eta zinema Madrilen. Gaur egun Berrobiko Txalo Talo antzerki taldeko zuzendaria eta Tolosako Samaniego eskolako antzerki irakaslea da, beste antzerki talde batzuekin kolaboratzeaz gain.

Barrena Kultur Etxean ospatzen  ari den Ahoz Aho ahozkotasunaren jaialdiaren azkeneko astean sartuko da, eta asteartean Maider Delgado narratzailea izango da Barrenan. Maider Delgadok, goizez herriko ikastetxeetan bere lana aurkeztu ondoren, bere narrazio dohainak zabalduko ditu Barrenan 18:00etatik aurrera, sarrera librearekin.

Mireia Delgado, Pedagogian lizentziatua da eta azken 10 urteak, ikaskuntza prozesuak, hezkidetza eta haur literatura uztartu ditu proiektu eta erakunde desberdinekin elkarlanean. Hainbat eta hainbat egitasmo diseinatu eta burutu zituen zenbait ikasturtez Bizkaiko Urtxintxa Eskolan. Galtzagorri elkartean ere hainbat dira dinamizaturiko proiektuak. Kilometroak eta kilometroak haur literaturaz beteriko altxorrekin. 

Ahoz-Aho jaialdiaren edizio berriak, ahozko tradizioko kontakizunak, literatur narrazioak, joko eszenikoak, poema musikatuak, deklamatutako bertsoak, hitz-jokoak eta beste ikuskizun mordo bat ekarriko dizkigu Ordiziara, denak ere ipuinetan oinarritutakoak. Ahoz Aho jaialdia pasa den martxoaren 5ean hasi zen, X Narrazio lehiaketarekin, eta larunbaterako programa bikoitza iragarri du.

Hainbat estilo eta hainbat forma, gure mundu anitz, mestizo eta kultura askotarikoaren erakusgarri. Kultura desberdinak, mundu ikuskera desberdinak, jarri nahi dira aurrez aurre, mendean hartu nahi gaituen kultur globalizazioari ihes eginez. Elkar ezagutzea da helburua, harremanak ezartzea eta areagotzen ari den mestizaje aberasgarria onartzea, bakoitzak bere izateari eutsiz.

Larunbat honetan, hilak 19, arratsaldeko 5etatik aurrera, sarrera librearekin, Barrena Kultur Etxean Jaialdiko plater nagusietako bat izango da, Maider Alcelayk (Euskal Herria) eta Nicolas Buenaventurak (Kolonbia) parte hartuko duten familia-saio batekin.

Komentatu dugun bezala Maider Alcelay arrasateko narratzaile trebearekin batera Nicolas Buenaventura kolonbiarra izango dugu. Nicolas Buenaventura, ahozko narrazio eszenikoaren ikonoa da eta Latinoamerikako eta Europako narratzaile adierazgarrienetako bat. Narratzailea, aktorea, idazlea, gidoilaria eta zinema-zuzendaria — hainbat dira kolonbiar honen lanbideak (Calin jaio zen 1962ko abuztuaren 7an). Enrique Buenaventura antzerkigile zenaren semea, Paristik hainbat herrialdetan (Polonia, Mexiko, Estatu Batuak, Boli Kosta, Burkina Fasso, Madagaskar, Puerto Rico, Frantzia, Espainia, Panama, Peru, eta abar) bira egiten ari zela, bere ipuinak kontatzeko atera zen, batzuetan liburu txiki eta zaporetsuetan bildu dituenak, edo ahozko tradizioan geratzen direnak. Familiako tradizio luzeko aktore, antzerki-zuzendari, zinemagile eta ahozko narratzaile trebe hau entzuteko aukera paregabea.

Eta arratsaldeko 19:00etatik aurrera jaialdia kalera aterako da, Plaza Nagusira eta Garagartza plazara joango da, hurbileko magia proposamen batekin, Imanol Ituiño, David Blanco eta Diego Calavia magoen eskutik.

Mokadutxo erakargarria larunbaterako, arratsaldeko 17:00etatik aurrera Barrena Kultur Etxean ipuinen mundu magikoaren bitartez hitzaren hurbiltasunarekin eta 19:00etan kalean, zuzeneko magiaren hurbiltasunarekin eta distantzia laburreko sorginkeriarekin.