Ostiral honetan, hilaren 21ean, Herri Antzokian "Antzerki garaia" programaren lehen saioa izango dugu ikusgai Ordizian, eta oraingo honetan Txalo konpainiak “Lehendakari gaia” lana aurkeztuko du, Iker Galarza eta Zuhaitz Gurrutxaga aktoreekin. "Antzerki garaia" egitaraua Beasain eta Ordiziako Udaletako Kultura Sailek bultzatu eta antolatu dute, Gipuzkoako Foru Aldundiaren eta Euskadiko Antzerti sarearen lankidetzekin. Emanaldia 20:30ean eskainiko da.

“Lehendakari gaia” Ramon Madaularen testu bat da, Martin Agirrek euskaratua eta Begoña Bilbaok zuzentzen duena. Oholtza gainera igoko direnak Iker Galartza eta Zuhaitz Gurrutxaga dira, lehena lehendakari gaiaren paperean eta bigarrena, aldiz, psikiatra gisa.

Lehendakari hautatu berria inbestidura-ekitaldirako hitzaldia prestatzen ari da; azken orduan, ordea, arazo larri bat sortuko zaio. Izan ere, ekitaldia eta hitzaldia eman beharrak aurpegian gestu (tik) arraro, barregarri eta aguantaezina eragin diote hautetsiari. Kendu ezina. Ekitaldi nagusia izorratzeko arriskua dago. Arazoa bideratzeko psikiatra bat ageriko da eta ondorioz, bien artean berriketaldi dibertigarri eta nahasgarri bat sortuko da.

Zer du bakoitzak ezkutatzeko? Zein dira bakoitzaren benetako motibazioak? Atzera begiratuta, bizitzan zerk ekarri ditu dauden lekura? Eta batez ere, bata zein bestea, euren eginkizunetan bokaziodunak al dira?

Ramon Madaularen komedia bikain baten egokitzapena da honakoa, poltronaren atzetik dabilenaren gabeziak agerian uzten dituena. Egileak dioenez, beti sentitu da kezkatuta "norbait bere herrialdeko presidente izatera bultzatzen duten benetako motibazioak zeintzuk diren jakiteagatik; herritar gehienok baztertu egingo genuke erantzukizun hori". "Susmoa dut, botere-handinahiaz edo mundua hobetzeko irrika legitimoez gain, hautagaiak berak ere ezagutzen ez dituen beste arrazoi batzuk ere badaudela", gaineratu du.

Pertsona bat herrialde baten buru izatera bultzatzen dituen motibazioei buruzko hausnarketa bultzatzen du lan honek, botere-pertsona horrek handinahiaz edo mundua hobetzeko izan dezakeen nahaiaz haratago. Erantzukizun hori herritar gehienok saihestu egingo genuke, ziur.

"Lehendakari gaia" pieza komikoa da, eta bertan, herrialde bateko presidenteak inbestidura-hitzaldia egin behar duen egunean horretara bultzatu duten benetako arrazoiak ezagutzen ditu.

Emanaldia erdi mailako puntu interesgarri batean kokatzen da, eta ironia finez irribarre eginarazten du, non publikoa pozik irteten den antzokitik, obra erraza, mezuarekin, publiko guztiarentzat. Sarrerak aldez aurretik salgai Barrena Kultur Etxean eta egunean bertan Herri Antzokian.

Ostiral honetan, goizeko 10:00etatik aurrera Youtubeko kanalean ikusgai izango dira Liburu Baby Klubaren barnean, beste hiru bideo.

Liburu Baby Kluba 0 eta 3 urte bitarteko umeei zuzenduriko jarduera ludiko eta didaktikoa da. Jarduaren ardatza eta abiapuntua liburua da eta helburu nagusia umeengan txikitatik eta beraien familiengan literatura, musika, artea eta naturarekiko interesa piztea da. Liburu Baby Kluba ekintza kulturanitza da eta horregatik, euskaraz, gazteleraz eta ingelesez garatzen da. 

Ordizia eta Beasaingo Udalek elkarlanean antolatutako Antzerki Garaia programa urtarrilaren 14an hasiko dugu. 8 obra eskainiko dira guztira, antzerkiari eta batez ere euskarazko antzerkiari bultzatuz. Emanaldi guztiak 20:30etan hasiko dira, eta hemen duzue programa osoa.
Emanaldi bakoitzeko sarrera 12 eurokoa izango da eta emanaldi guztien abonoa 72 eurokoa. Sarrerak urtarrilaren 10a bitarte eskura daitezke Barrenan edo 943 80 56 30 telefonoan, eta egunean bertan lehiatilan.

Programa 2022

Giza Eskubideak Herria VI. Nazioarteko Korto Lehiaketako lehen saria eta sari gaztea, biak, ‘Roberto’ laburmetraiak irabazi ditu, Carmen Córdobaren zuzendaritzapean. Goierriko sari onena, berriz, Oianguren institutuko Terapistak antzerki taldearentzat izan da. Guztira, 210 film labur jaso dira munduko 23 herrialdetatik. Zorionak parte hartzaile guztiei eta sarituei!