Igande honetan Udal Kultura sailak antolatzen duen familientzako KULTURA FAMILIAN BIZI zikloan hirugarren ikuskizuna izango da ikusgai. Eguerdiko 12:00etatik aurrera, Didau Antzerki Faktoriak “Peru eta otsoa” lana eskainiko du Herri Antzokian.

DIDAU antzerki faktoria Ainhoa Agirre eta Juanma Álvarez-ek Zarautzen kokatzen da antzerki taldea da. Madrilen eta Sevillan, haur, gazte eta senitarteko antzerki munduan hogeita hamar urteko esperientziarekin, eta orain Euskal Herrian ibilbidearen jarraipenean. Haur-antzerkia, txotxongilo antzerkia, antzerki ikastaroak, eskoletarako, udaletarako eta enpresetarako kanpaina bereziak, eta abar. Eta beti, dena, haurrekin eta haurrentzat, euskaraz.

Otsoa. Haurrengan beldur handienetakoa sortzen duen animalia da. Mila eta bat ipuinetan protagonistaren aurkari ankerra. Baina badira beste era bateko otsoak, baita dibertigarriak ere. Adibidez, Peru eta otsoa antzezlanean ikus daitekeena. Serguéi Prokófiev musikoaren ipuin sinfoniko klasikoan oinarritutako “Peru eta Otsoa” ikuskizunean bi pertsonaia xelebrek, imajinazioaren bidez, eta esperientziak ematen duen inozentziarekin, adiskidetasunaren bihotzeraino bidaiatuko dute.

Antzezlana Serguei Prokofiev konposatzaile errusiarrak 1936. urtean aurkeztu zuen sinfonia baten moldaketa da. Moskun estreinatu zenean ez zuen arrakasta handirik izan, baina, hala ere, belaunaldiz belaunaldi pasatu da eta gaur egunera arte hainbat moldaketa izan ditu. Walt Disneyek marrazki bizidunetara eraman zuen 1946. urtean eta 1978an David Bowie handiak narratzaile lanak egin zituen urte hartan ateratako disko batean.

Prokófiev-en ideia, musika sinfonikoa haurrei modu dibertigarri batean hurbiltzea zen eta honela egin zituen konposizio sinfonikoa eta ipuinaren moldaketa ere. Ipuin errusiar klasiko honen pertsonaiak hartu zituen eta bakoitzari orkestako instrumendu bat egokitu zion errepresentazio modura. Honela, Peru, orkestako hari-instrumenduen bidez azalduko zaigu. Peruren laguna, txori txikia, zeharkako txirula izango da, zoritxarreko ahatea oboea, katu zuhurra klarinete goxoa, aitona, beti marmarrean fagota, basoan bizi den otso handi grisa trompak, eta azkenik, basoan dabiltzan ehiztariak, tinbalak eta bonboa. Eszenatokian zuhaitz eder bat, gramofono zahar bat eta eguneroko traste pilo baten laguntzarekin ipuina kontatuko diguten kaleko, munduko, bi pertsonaia.

21. mendeko bufoiak, bi pertsonaia , denboragabe, gizartearen mugetan, imajinazioz, samurtasunez, optimizmoz, freskuraz blai, baina laguntasunaren beharrean. Laguntasuna euren desioen ardatz: nik zuri entzuten dizut, zuk niri, elkarri entzuten diogu eta elkarrekin bizi gaitezke loturarik gabe, denboraz, espazioaz eta geure buruez haratago. Konpenetrazioa: elkarrekin ahal da, dibertigarria, pozgarria da.. eta umorearekin, komikotasunarekin dena puntuan.

Familia osarentzako antzerkia, “Peru eta Otsoa” haurrentzako ipuin sinfonikoen jatorria, atenporala eta haurrentzat egin den sinfonia garrantsitsuena, oraingoan, DIDAU antzerki taldearen bertsio berezian igande honetan Herri Antzokian. Eta datorren azteazkenean, arratsaldez Txotxongiloak, Poloniako Ola Muchin taldearekin. Sarrerak salgai Barrena Kultur Etxean.

Ostegun honetan Ordiziako Udalak antolaturiko “Bizi Musika” zikloan, hirugarren kontzertua izango dugu Eñaut Zubizarreta “Trigger” musikariaren eskutik. Hitzordua Herri Antzokian, arratsaldeko 19:30etan.

Eñaut Zubizarreta (TRIGGER) biolontxelista, bere bigarren bakarkako lana aurkeztera dator: POLIEDRO Vol.I. Lan honetan, biolontxeloa, musika klasikoari hertsiki lotuta dagoen instrumentua, bestelako esparru batzuetara eramaten du. Horrela, besteak beste hardcorea, post-rocka, stonerra, flamencoa edota technoa entzun ahal izango ditugu, beti biolontxeloa ardatz izanda. Ostegun honetako zuzenekoan trio fomatuan ariko da, Quico Puges eta Jokin Garmendia alboan dituelarik. Alta, loop zein efektu pedalak ere erabiliko ditu, eta performanceari osotasuna emateko Amaiur Luluaga dantzari garaikidea izango du lagun.

Arrasate Musikalen biolontxelo ikasketak egin ostean Bartzelonako Goi Mailako Musika Eskolan ikasketak burutu zituen. Horiek amaitutakoan denbora bat "bakarka trebatzen" ibili zen lengoaia modernoarekin lotutako klaseak jasotzen. Alemaniara salto egin eta bertan "biolontxeloa beste era batera jo daitekeela" deskubritu zuen: "txeloarekin jo daitezkeen korronte asko daude, norberak bere esperientzia pertsonaletik sortzen duelako". Horrek animatu zuen, hain zuzen ere, Poliedro Vol. 1 bezalako zerbait egitera "perspektiba horrekin ahalduntzeko eta, aldi berean, Euskal Herriko interpreteek biharko egunean bertako erreferentziaren bat izateko".

2017. urtean TRIGGER ezizenez ezagutarazi zen euskal eszena musikalean, eta 2019an argitaratu zuen bere bakarkako lehen diskoa (Esku Bi Hamar Hatz, Autoekoizpena). Era berean musika modernoaren lengoaian trebatzen jarraitu zuen Martin Melendez txelistarekin, Kolonian egindako New Directions Cello Festival-en, eta baita era autonomoan ere.

Biolontxeloarekin bide berriak zabaltzen dihardu egun, mundu mailan biolontxeloa interpretatzeko dauden korronteak ezagutu eta Euskal Herrira ekarri, hemen ere jakintza hoiek errotu eta harrobia sortzeko asmoz.

Sarrerak aldez aurretik salgai: Kutxabank-sarrerak (webgunean eta kutxazainetan) eta ostegunean bertan Herri Antzokian.

Gaur, ostirala hasi, eta abenduaren 3ra arte, Barrena Kultur Etxeko Erakusketa Aretoan,  Mari Paz Arrugaeta Ordiziako artistaren pinturak  izango dira ikusgai, baita eskultura batzuk ere. Erakusketa ohiko ordutegia izango du: Astelehenetik ostiralera irekita Barrenako ordutegiarekin (Igandetan eta jaiegunetan itxita).

Erakusketaren katalogoan horrela aurkezten du Arrugaetak bere ibilbidea eta lana: “Txikitatik bizitzak zailtasunak erakusten dizkidan arren, sormenak bere tokia bilatzen du eta irteten saiatzen da. 

1978 – Urtebete Donostian marrazketaren teknika ikasten. Autodidakta moduan jarraitu nuen bakarkako lanean. 

1981 – Nire lanari buruzko iritzi kritikoa nahi nuen, eta Oteizari nire lanen argazkiak bidali nizkion. Jenio handi eta persona zoragarri honek idatziz erantzun zidan.Geroago, Orioko etxera joan nintzaion bisitan.

Nire oroitzapenen baso magikoan hiru edo lau hilabeteko haurtxo bat dago, pago handi baten azpian lo dagoena. Argi-izpiak hostoetan zehar iragazten dira, keinuak eginez.

Argiak, formak eta koloreak grabatuta geratuko dira, haur baten garunean haurtzaroan gertatzen den guztia grabatzen den bezala.

Atzo, gaur eta bihar

Une batean batzen dira

Eta une hori orain da.

Aurkezten ari naizen erakusketan sormenaren iturri agortezina itzultzen da. Lamiak, Basajaun, Mari… oraindik birjina zen naturak guztia irudikatzen zuen iragana: babesa, janaria eta magia.

Udazkeneko hitzorduari leial, aste bukaera honetan, igandean hain zuzen,  hasiko da Ordizian BARROKO AIRE, Musika Barrokoaren egunak jaialdiaren XXVI.ekitaldia. Eta jaialdi horrek Ordizian segituko du hilabete honetako igandeetan; herriko Parrokian lau kontzertu egingo dira 18:30etan,   Ordiziako Udalak eta Gipuzkoako Foru Aldundiak antolatuta.

“Aurten ere Barroko Aire zikloa izango dugu azaroko igandeetan, herriko parrokian. Badakigu jendeak gogoz itxaroten duen hitzordua izaten dela, eta aurten ere lau kontzertu bikainez gozatzeko aukera izango da, doan”, zehaztu du Lander Mujika, kultura zinegotziak.

Aurtengo egitaraua igandean, hilak 7, hasiko da, Oñatiko Ganbara Abesbatza eta Aequus Ensemblerekin. Ondoren, hilaren 14an, Ensemble OBNIren (identifikatu gabeko objektu barrokoa) proposamena etorriko da, Miriam Hontana gaztearen ekimena, XVII. eta XVIII. mendeko biolinerako errepertorio bikainerako zuen grina askatzeko. Hilaren 21ean, La Guirlande taldearen txanda izango da. XVIII. eta XIX. mendeetako musikaren interpretazio historizistan espezializatutako ensembleetako bat da eta "Virtuosos viajeros españoles en la Europa de la Ilustración" izeneko programa erakargarria aurkeztuko dute. Eta azaroaren 28an, Ander Telleria soinujolearen proposamen interesgarri batek emango dio amaiera jaialdiari. Anna Margules flauta-jotzailearekin eta Tetraphilla ahots-taldearekin batera, honako kontzertu hau aurkeztuko dute: « Ad Maiorem Dei Gloriam”, Loiolako San Inazioren bizitzako ibilbide bat, bere garaiko musikaren bidez.

Zikloko lehen kontzertuan, euskal interpreteek protagonismoa izango dute, Oñatiko Ganbara Abesbatzak, Aequus Ensemble ganbera-orkestrak, Irene Fraile sopranoak, Nerea Gonzalez kontraltoak, Aitor Garitano tenorrak eta Ander Simal baritonoak parte hartuta, guztiak Aitor Biainen zuzendaritzapean.

TOTAL BACH izenburua daraman kontzertu honetan, Ganbara Abesbatzak eta Aequus Ensemblek Bachen kantatak eta moteteak eskainiko dituzte. Lehenengo zatian Aus der Tiefen rufe ich, Herr, zu dir BWV 131 eta Nach dir, Herr, verlanget mich BWV 150 kantatak izango dira nagusi eta bigarrenean, berriz, BMV 227, Jesu Meine Freude motetea. Johann Sebastian Bach-en kantatak egun musika munduan dauden altxorrik preziatuenetarikoak dira.

Ganbara Abesbatza 1994an 12 gaztek sortutako ahots nahasien abesbatza da. Urtez urte, ilusio berarekin, taldea haziz joan da, egun, Aitor Biain Bidarteren zuzendaritzapean, 30 pertsona inguruko taldea osatu arte. Errepertorioan mota eta garai guztietako lanak ikus ditzakegu: polifonia, folklorea, gospel, espiritualak… euskal folkloreak eta gaur egungo konposatzaileek abesbatzaren egitarauetan zati garrantzitsua osatzen dute.

Bi hamarkada pasatxo hauetan, Ganbara Abesbatzak hainbat lehiaketatan hartu du parte, eta horren fruitua, hainbat lehenengo, bigarren eta hirugarren sari, lan baten interpretazio hoberenaren saria, zuzendari hoberenaren saria,… aitortza guzti hauek Euskal Herriko, Estatuko eta nazioarteko abesbatzen lehiaketetan lortutakoak. Sari horietaz gain, Ganbara Abesbatzak hainbat jaialditan hartu du parte eta kontzertu ugari eskaini du, Euskal Herrian, Estatuan zein atzerrian.

Sari horietaz gain, Ganbara Abesbatzak hainbat jaialditan hartu du parte eta kontzertu ugari eskaini du, Euskal Herrian, Estatuan zein atzerrian. Sortu zenetik gainera, hiru disko grabatu ditu: “SAGATZ”, 2004ko abenduan, “AMARAUN”, 2014ko abenduan, “GURE BIDEA”, 2018ko azaroan

“Barroko Aire” giroarekin hitzordua, igande honetan Ordiziako Parrokian ; J.S. Bachen musikaz gozatzeko aukera paregabea, Ganbara Abesbatzaren eta Aequus Ensembleren eskutik.

Hemen duzue programa osoa: Barroko Aire 2021