Ostegun honetan Ordiziako Udalak antolaturiko musika zikloa zabalduko du Mikel Urretagoiena baterijole ordiziarra herrian da bueltan Bizi Musika zikloari hasiera emateko. Ander Garcia (kontrabaxua) eta Iñigo Ruiz de Gordejuela (pianoa) musikariekin batera. Emanaldia 19:30ean izango da, eta abonoak ziklorako eta sarrerak kontzerturako Herri Antzokian eta Kutxabank-sarrerak webgunean daude salgai: Sarrerak

Mikel Urretagoiena Ordizian jaio zen, 1991n. Jazz Bateriaren Interpretazioan graduatua da Euskal Herriko Goi Mailako Musika Kontserbatorioan (Musikene), eta bertan, besteak beste, Jo Krause, Guillermo McGill, Bob Sands, Joaquín Chacon eta Mariano Díaz musikarien klaseak jaso ditu. 2016an Master ikasketak amaitu zituen Groningenen (Holanda). Garai honetan, bost hilabetez New Yorkera joan zen, Ari Hoenig, Kendrick Scott, Mark Guiliana, Nate Smith, Ziv Ravitz eta Nasheet Waits bezalako jazz artista handien eskolak jasoz. Gaur egun, Madrilen bizi da, eta irakasle eta musikari gisa egiten du lan, estatu eta nazioarte mailan sona handia duten musikariekin batera joz. The Machetazo, Dani Pozo 4tet, Ander García Trío eta Wasabi Hurricane proiektuetako kide aktiboa da.

Herri Antzokian aurkeztuko duen emanaldian,  azken urteetan konposatutako kantuak aurkeztuko ditu hirukote formatuan (pianoa, kontrabaxua eta bateria). Urretagoienak izan dituen proiektu ezberdinen eta ibilbide profesional zabalaren islada izango da emanaldia. Hainbat musika estilo entzun ahal izango ditugu bertan, momentuoro inprobisazioa erdigunean jarriz. 

Urretagoienarekin batera Ander Garcia kontrabaxu jotzaile barakaldarra izango da. Garcia izen handiko musikariekin batera aritu da, hala nola Jeff Berlin, Rodney Kendrick eta Rhonda Ross, Jorge Pardo… Lau disko kaleratu ditu: Live in BBK, Amahiru, Ttun Kurrun eta Hiru. Baxu eta taldeetako irakaslea da Alfontso X.a Unibertsitatean eta Madrilgo Esmuva eskolan.

Eta hirukotea osatzeko Iñigo Ruiz de Gordejuela (Mendaro, Gipuzkoa, 1994) musikari familia batean jaiotako jazz pianista eta konpositorea izango dugu. Gasteizko Jesus Guridi kontserbatorioan pianoko gradu profesionala amaitu ondoren, Bostongo Berklee College of Music-era joan zen jazz ikasketak egitera. 2016an New England Conservatoryko beka jaso zuen master bat ikasteko. 2019an Surrogate Activities Nonet argitaratu zuen, Bostonen (AEB) grabatua.

Musika proposamen interesgarria ostegun honetan Herri Antzokian.

Ikasturte berriarekin batera gogotsu helduko die Ordiziako Irakurle Taldeak irailaren 24an irakurketa eta solasaldi berriei. Ordiziako Irakurle Taldea hilean behin elkartzen da Barrenan azken hilabetean irakurgai izandako liburuaren inguruan solasean aritzera. Euskal Literaturako zortzi liburu irakurri zituen taldeak iazko ikasturtean eta aurtengo ikasturterako irakurgaien zerrenda osatua dute. Irailean hasi eta ekainera bitartean hamar liburu irakurriko dituzte eta horien inguruan solasean aritzeko tartea hartuko dute. Liburuak Ordiziako Udal Liburutegiak jartzen ditu eskuragarri eta beraz, taldean parte hartu nahi duenak nahikoa du liburutegira hurbildu eta liburua eskatzearekin. Ordiziako Udalaren laguntzaz, Irati Goikoetxea beasaindarra arduratuko da aurten ere tertuliak gidatzeaz; bere hitzetan sentipen, bizipen, esperientzia eta iritzi trukerako oso gune aberatsa da Irakurle Taldea. Ordiziar guztiak gonbidatu  eta animatu nahi dituzte ateak zabal-zabalik dituen taldean parte hartzera.

Paco Rocaren “Zimurrak”

Paco Rocaren “Zimurrak” komiki liburuarekin emango diote ikasturteari hasiera. Besteak beste, Alzheimer gaitza eta zahartzaroko dementzia ditu kontagai liburuak; sentikortasun samurrez landua dago muina, tarteka umore ukituren batekin, baina sekula karikaturan erori gabe. Zimurrak albumak Komikiaren Sari Nazionala bereganatu zuen 2008. Urtean. Dagoeneko liburua liburutegian eskatu eta eskura dezake Irakurle Taldean parte hartu nahi duenak. Irailaren 24an Barrena Jauregian elkartuko da taldea arratsaldeko 18:00etan liburuaz solasean aritzeko.

Ikasturtean zehar irakurriko dituzten gainerako liburuak: urrian “Dendaostekoak” (Uxue Alberdi), azaroan “Erabili goldea hilen hezurren gainetik” (Olga Tokarczuk / Itzultzailea: Amaia Apaulaza), abenduan “17 segundo” (Kirmen Uribe), urtarrilean “Herriak ez du barkatuko” (Irati Goikoetxea), otsailean “Goliat eta izarrak” (Patxi Zubizarreta), martxoan “Bakean utzi arte” (Itxaro Borda), apirilean “Miñan” (Amets Arzallus / Ibrahima Balde), maiatzean “Arroz urez” (Mikel Antza), ekainean “Alter ero” (Bertol Arrieta).

Ordiziako Udaleko Kultura Sailak, Udal Liburutegiarekin batera, "Liburu Baby Kluba" jarduerari ekingo dio berriro,  Mestiza Elkartearen laguntzarekin, eta aurrez aurreko saioaren ordez, jarduera online egingo da, youtubeko udal-kanalaren bidez. Lehen online saioa datorren ostiraletik aurrera egongo da ikusgarri, irailak 17, goizeko 10:00etatik aurrera. Hala, hiru bideo izango dira eskuragarri jarriko direnak herritarrentzat.

Liburu Baby Kluba 0 eta 3 urte bitarteko umeei zuzenduriko jarduera ludiko eta didaktikoa da. Jarduaren ardatza eta abiapuntua liburua da eta helburu nagusia umeengan txikitatik eta beraien familiengan literatura, musika, artea eta naturarekiko interesa piztea da. Liburu Baby Kluba ekintza kulturanitza da eta horregatik, euskaraz, gazteleraz eta ingelesez garatzen da.

Pandemiangatik saio presentzialak bertan behera utzi dira eta horien ordez saio bakoitzeko edukiak bost minutuko iraupena izango duten hiru bideotan jasoko dira: abestiak, poesiak, liburuen irakurketak eta literaturaren mundu magikoa ezagutzeko gomendioak.

Bideoren bidez garatuko diren saioetan familiek ipuinez eta abestiez gozatuko dute elkarrekin, euskaraz, gazteleraz eta ingelesez.

Ipuinetako narratzaileak hauexek dira: Mónica Gracia (euskara), Josie Yañez (ingelesa) eta Ana Molina (gaztelania)

Ikasturte berriarekin batera, ordiziar kultur bizitza martxan jartzen ari da, eta urteko azken lauhilekoak ekitaldiz beteriko kultur agenda eskaintzen du. Iraileko lehen hamabostaldian egin diren dantza eta antzerki jardueren ostean, "Musika Bizi" kontzertu ziklo interesgarria itzuliko da Herri Antzokira, iaz estreinatutakoa. Euskal Herriko musikariak bilduko ditu zikloak, publiko ororentzako kontzertuetan. Ostegunetan 19:30ean izango dira saioak.

Iaz bezala, lau kontzertuetarako bono bat jarri da salgai, 28 euroan, eta sarrera solteak 10 euroan izango dira. Abonuak Herri Antzokiko lehiatilan eros daitezke (astelehen, astearte, larunbat eta igandeetan, 19:30etatik 20:00etara) eta sarrera solteak, Herri Antzokian edo Kutxabank-sarreretan.

4 emanaldi

“Ordizian kultur eskaintza zabala dugu, dudarik gabe. Iaz estreinatu zen Musika Bizi zikloak emaitza oso onak eman zituen, eta jende ugari gerturatu zen zikloaren barnean eskaini ziren kontzertuetara. Gauzak horrela, aurten ere espero dugu jendearen gustokoak izatea eskaintzen ditugun proposamenak. Gainera, zikloa zabalduko duen lehen musikaria ordiziarra da; horrek ere erakusten digu herrian baditugula punta puntako profesionalak”, zehaztu du Lander Mujika, kultura zinegotziak.

Mikel Urretagoiena (bateria) musikari ordiziarraren proposamenak zabalduko du zikloa irailaren 23an, Ander Garcia (baxua) eta Iñigo Ruiz de Gordejuela lagun dituela. Lau urte Musikenen (Euskal Herriko Goi Mailako Musika Ikastegia), bi Holandan eta New Yorken eta bost Madrilen eman ondoren, Mikel Urretagoiena bateria jotzaile ordiziarra herrian da Bizi Musika zikloari hasiera emateko. Emanaldi honetan azken urteetan konposatutako abestiak aurkeztuko ditu hirukote formatuan (pianoa, kontrabaxua eta bateria).

Urriaren 14an, gaur egungo Blues-Rock taldearen indartsuenetako bat izango dugu: Noa & The Hell Drinkers; “Craft Blues” bigarren albuma labetik atera ondoren, Hondarribia Blues, Benicassim Blues, edo Burlata Blues bezalako jaialdietan arrakasta izatetik datoz. Taldearen zuzeneko emanaldiek kritikariak eta ikusleak bereganatu dituzte, kontzertu gehienetan sarrera guztiak agortuz. European Blues Challenge 2020an Espainia ordezkatuz finalista izandakoak, `Craft Tour´ aurkezpen biran murgilduta daude orain, euren energia munduan zabalduz.

Azaroaren 18an, Herri Antzokiko eskenatokian proposamen musikal berri bat izango da, "Trigger" egitasmoarekin, Eñaut Zubizarretaren eskutik. Zubizarretak txeloaren ikasketa klasikoak jaso zituen arren, duela urte batzuk TRIGGER egitasmoa jarri zuen martxan eta rocketik eratorritako musikak instrumentu horrekin, txeloarekin,  lantzen hasi zen. Zuzenekoan, Quico Puges eta Jokin Garmendia biolontxelo jotzaileekin egongo da kamera kantuetan eta Amaiur Luluaga dantzariarekin techno kantuetan.

Eta zikloa ixten duen laugarren kontzertua "Habia" Iparraldeko taldearen eskutik etorriko da, abenduaren 16an. Amaia Hiriartek, Maia Iribarnek eta Elena Hairak osatutako soka eta ahots talde honek tradiziotik eta sorkuntzatik sortutako musika proiektu bat aurkezten du, herri kantuen eta euskal poesien nahasketa, jazza, musika garaikidea eta aire tradizionalak oinarri hartuta.