Gaur, ostirala hasi, eta abenduaren 3ra arte, Barrena Kultur Etxeko Erakusketa Aretoan,  Mari Paz Arrugaeta Ordiziako artistaren pinturak  izango dira ikusgai, baita eskultura batzuk ere. Erakusketa ohiko ordutegia izango du: Astelehenetik ostiralera irekita Barrenako ordutegiarekin (Igandetan eta jaiegunetan itxita).

Erakusketaren katalogoan horrela aurkezten du Arrugaetak bere ibilbidea eta lana: “Txikitatik bizitzak zailtasunak erakusten dizkidan arren, sormenak bere tokia bilatzen du eta irteten saiatzen da. 

1978 – Urtebete Donostian marrazketaren teknika ikasten. Autodidakta moduan jarraitu nuen bakarkako lanean. 

1981 – Nire lanari buruzko iritzi kritikoa nahi nuen, eta Oteizari nire lanen argazkiak bidali nizkion. Jenio handi eta persona zoragarri honek idatziz erantzun zidan.Geroago, Orioko etxera joan nintzaion bisitan.

Nire oroitzapenen baso magikoan hiru edo lau hilabeteko haurtxo bat dago, pago handi baten azpian lo dagoena. Argi-izpiak hostoetan zehar iragazten dira, keinuak eginez.

Argiak, formak eta koloreak grabatuta geratuko dira, haur baten garunean haurtzaroan gertatzen den guztia grabatzen den bezala.

Atzo, gaur eta bihar

Une batean batzen dira

Eta une hori orain da.

Aurkezten ari naizen erakusketan sormenaren iturri agortezina itzultzen da. Lamiak, Basajaun, Mari… oraindik birjina zen naturak guztia irudikatzen zuen iragana: babesa, janaria eta magia.

Udazkeneko hitzorduari leial, aste bukaera honetan, igandean hain zuzen,  hasiko da Ordizian BARROKO AIRE, Musika Barrokoaren egunak jaialdiaren XXVI.ekitaldia. Eta jaialdi horrek Ordizian segituko du hilabete honetako igandeetan; herriko Parrokian lau kontzertu egingo dira 18:30etan,   Ordiziako Udalak eta Gipuzkoako Foru Aldundiak antolatuta.

“Aurten ere Barroko Aire zikloa izango dugu azaroko igandeetan, herriko parrokian. Badakigu jendeak gogoz itxaroten duen hitzordua izaten dela, eta aurten ere lau kontzertu bikainez gozatzeko aukera izango da, doan”, zehaztu du Lander Mujika, kultura zinegotziak.

Aurtengo egitaraua igandean, hilak 7, hasiko da, Oñatiko Ganbara Abesbatza eta Aequus Ensemblerekin. Ondoren, hilaren 14an, Ensemble OBNIren (identifikatu gabeko objektu barrokoa) proposamena etorriko da, Miriam Hontana gaztearen ekimena, XVII. eta XVIII. mendeko biolinerako errepertorio bikainerako zuen grina askatzeko. Hilaren 21ean, La Guirlande taldearen txanda izango da. XVIII. eta XIX. mendeetako musikaren interpretazio historizistan espezializatutako ensembleetako bat da eta "Virtuosos viajeros españoles en la Europa de la Ilustración" izeneko programa erakargarria aurkeztuko dute. Eta azaroaren 28an, Ander Telleria soinujolearen proposamen interesgarri batek emango dio amaiera jaialdiari. Anna Margules flauta-jotzailearekin eta Tetraphilla ahots-taldearekin batera, honako kontzertu hau aurkeztuko dute: « Ad Maiorem Dei Gloriam”, Loiolako San Inazioren bizitzako ibilbide bat, bere garaiko musikaren bidez.

Zikloko lehen kontzertuan, euskal interpreteek protagonismoa izango dute, Oñatiko Ganbara Abesbatzak, Aequus Ensemble ganbera-orkestrak, Irene Fraile sopranoak, Nerea Gonzalez kontraltoak, Aitor Garitano tenorrak eta Ander Simal baritonoak parte hartuta, guztiak Aitor Biainen zuzendaritzapean.

TOTAL BACH izenburua daraman kontzertu honetan, Ganbara Abesbatzak eta Aequus Ensemblek Bachen kantatak eta moteteak eskainiko dituzte. Lehenengo zatian Aus der Tiefen rufe ich, Herr, zu dir BWV 131 eta Nach dir, Herr, verlanget mich BWV 150 kantatak izango dira nagusi eta bigarrenean, berriz, BMV 227, Jesu Meine Freude motetea. Johann Sebastian Bach-en kantatak egun musika munduan dauden altxorrik preziatuenetarikoak dira.

Ganbara Abesbatza 1994an 12 gaztek sortutako ahots nahasien abesbatza da. Urtez urte, ilusio berarekin, taldea haziz joan da, egun, Aitor Biain Bidarteren zuzendaritzapean, 30 pertsona inguruko taldea osatu arte. Errepertorioan mota eta garai guztietako lanak ikus ditzakegu: polifonia, folklorea, gospel, espiritualak… euskal folkloreak eta gaur egungo konposatzaileek abesbatzaren egitarauetan zati garrantzitsua osatzen dute.

Bi hamarkada pasatxo hauetan, Ganbara Abesbatzak hainbat lehiaketatan hartu du parte, eta horren fruitua, hainbat lehenengo, bigarren eta hirugarren sari, lan baten interpretazio hoberenaren saria, zuzendari hoberenaren saria,… aitortza guzti hauek Euskal Herriko, Estatuko eta nazioarteko abesbatzen lehiaketetan lortutakoak. Sari horietaz gain, Ganbara Abesbatzak hainbat jaialditan hartu du parte eta kontzertu ugari eskaini du, Euskal Herrian, Estatuan zein atzerrian.

Sari horietaz gain, Ganbara Abesbatzak hainbat jaialditan hartu du parte eta kontzertu ugari eskaini du, Euskal Herrian, Estatuan zein atzerrian. Sortu zenetik gainera, hiru disko grabatu ditu: “SAGATZ”, 2004ko abenduan, “AMARAUN”, 2014ko abenduan, “GURE BIDEA”, 2018ko azaroan

“Barroko Aire” giroarekin hitzordua, igande honetan Ordiziako Parrokian ; J.S. Bachen musikaz gozatzeko aukera paregabea, Ganbara Abesbatzaren eta Aequus Ensembleren eskutik.

Hemen duzue programa osoa: Barroko Aire 2021

Udaleko Kultura sailak antolatuta, Tolosako Abesbatzen Nazioarteko Lehiaketa aprobetxatuz, Ordiziako parrokiara itzuliko dira abesbatza kontzertuak, Barroko Aire Jaialdiaren XXXVI. edizioaren atariko, zeina Parrokian ere aurkeztuko baita azaroko igandeetan.

COVID-19aren pandemiaren ondorioz iaz izandako geldialdiaren ondoren, Ordiziako eta Goierriko publikoak bi abesbatza talderen ahotsekin gozatzeko aukera izango du, kalitate maila egiaztatua duten taldeak.

Kontzertu-egunak honako hauek dira:

- Urriak 27, asteazkena, 20:00 h. “Coro de Jóvenes de Madrid”

- Urriak 28, osteguna, 20: 00 h. Stockholmeko (Suedia) Sofia Vocal Ensemble.

Madrilgo Gazteen Abesbatzak emango dio hasiera zikloari asteazken honetan. 80 bat kidez osatutako taldea da eta Juan Pablo de Juanek zuzentzen du. Bere ibilbide laburrean, Espainian erreferentziazko eta Europan proiekzio handiena duen gazte abesbatzetako bat izatea lortu du. 2014an sortu zenetik, hainbat kontzertu eskaini ditu kontinenteko hiri garrantzitsuenetan, hala nola, Paris, Erroma, Milan, Venezia, Budapest, Tallinn edo Berlinen. Horrezaz gain, nazioarteko jaialdi ugaritan parte hartu du, esaterako XI. World Symposium on Choral Music ekitaldian (Bartzelona), EUROPA CANTAT ekitaldiaren XIX. eta XX. edizioetan –Hungarian eta Estonian, hurrenez hurren-, edota Frantziako Choralies jaialdiaren 22. eta 23. edizioetan.

Jardun beteko ibilbidea egin duenez, “Coro de Jóvenes de Madrid” abesbatzak lehiaketa askotan eskuratutako sariz bete du bere palmares oparoa: Ejea de los Caballeroseko XLIV. Abesbatza Lehiaketa, Torreviejako Nazioarteko Habanera eta Polifonia Lehiaketaren 62. eta 65. edizioak, Villa de Rojaleseko 38. Sehaska Kanta eta Gabon Kanten Lehiaketa Nazionala, 8. Eterna Roma Nazioarteko Musika Jaialdia eta San Vicente de la Barquerako Marinel Kantuen LI. Lehiaketa. Gainera, 2020an gazte-abesbatza honek eman zion hasiera Torreviejako Nazioarteko Habanera eta Polifonia Lehiaketaren 66. edizioari.

Abesbatza 16 eta 30 urte bitarteko 80 bat abeslarik osatzen dute, eta, gaztea izan arren, abeslari beteranoak dira jada; izan ere, elkarrekin egindako ibilbide luzeaz gain, horietako askok haur abesbatzetatik bizipenak metatzen dituzte. Ezagutza horrek ematen duen esperientziari esker, errepertorio zabaleko abesbatza bat eratzea lortu da, konplexutasun tekniko eta bokal handiko obrei kaudimen eta azkartasun handiz heltzen diena. Bide berri hau Madrilgo Gazteen Abesbatza osatzen duten neska-mutilentzat lagunartean musika bizitzeko ametsa da, eta ikusleek, gazteek bereziki, musika koralaren magian parte hartzea lortzeko ilusioa.

Eta ostegunean Stockholmeko Sofia Vocal Ensemble suediar taldearen txanda.

Bengt Ollének Stockholmen sortu zuen Sofia Vokalensemble abesbatza, eta oraindik orain bera da taldearen zuzendari artistikoa. Bere emanaldietako ezaugarri nagusia da abesbatza-soinu suediarra, hau da, soinu goxo eta liriko bat, eta nazioarteko eszenan ezagun egin da bere taula gaineko presentziagatik.

Bach, Poulenc, Pärt eta Schnittke konpositoreen musika ohikoa da bere egitarauetan. Halaber, hainbat obra orijinal estreinatu ditu, besteak beste musikari hauenak: Jaakko Mäntyjärvi, Fredrik Sixten, Jacob Mühlrad, Sven-David Sandström, Matthew Peterson eta Karin Rehnqvist. Sofia Vokalensemble abesbatzak bere jardunaren oinarritzat ditu musikarekiko maitasuna, bikaintasunaren bilaketa eta zuzendariarekiko harreman hurbila, beti bihotzetik abiatuta, izan entsegu arrunt batean, bidaia batean, lehiaketa batean edo eszenatoki atzean. Eta jakina, elkarren ondoan taula gainean.

Bengt Ollén sortzaile eta zuzendari musikalak Gösta Ohlin eta Gunnar Eriksson maisuekin egin zituen bere ikasketak Göteborgeko Musika eta Drama Akademian. 1981az geroztik, hainbat koro arrakastatsu sortu ditu eta lanean jarraitu du bere gaitasunak hobetzeko. Ollén maiz deitzen dute lehiaketetako epaimahaikide, jaialdi, tailer nahiz kontzertuetako zuzendari eta musika irakasle lanetan aritzeko, bai Suedian bertan eta baita ere nazioartean. 1994 eta 2018 urteen artean kantu koraleko irakasle izan zen bigarren hezkuntzako Stockholms Musikgymnasium eskola ezagunean. Bere abesbatzek arrakasta handia izan dute mundu osoko hainbat lehiaketatan.

Hitzordu bikoitza beraz, asteazkenean eta ostegunean Ordiziako Eliz Parrokian, arratsaldeko 8etan, azaroko igandeetan ospatuko den “Barroko Aire” programaren aperitibo gisa.

Asteburu honetan ospatuko da Ordiziako frontoi txikian Ordiziarrock jaialdia. Ostiralean hiru kontzertu eskainiko dira: Oki Moki, Bamms eta Ezpalak, eta larunbatean beste hiru: Noir Socha, Sua eta Grises. Ostiralean ate irekiera 20:00etan izango da; larunbatean 19:00etan.

Sarrerak dagoeneko hemen erosi daitezke: https://ordiziarrock.com/ordiziarrock-xviii-2021erako-sarrerak-salgai/