Ostiral honetan, hilak 14, Tanttaka taldeak Giltzadun etxea antzezlana eskainiko du gaueko 22:15ean, Herri Antzokian.
Sarrerak dagoeneko salgai daude Barrena jauregian.

Antzerki garaia programaren hirugarren saioa izango da ikusgai ostiral honetan; Tanttaka konpainiak Giltzadun etxea lana aurkeztuko du. "Antzerki garaia" egitaraua Beasain eta Ordiziako Udaletako Kultura Sailek bultzatu eta antolatu dute, Gipuzkoako Foru Aldundiaren eta Euskadiko Antzerti sarearen lankidetzekin.

Giltzadun etxea lana Fernando Bernuesek zuzendu du, eta bertan Ainhoa Aierbe, Vito Rogado eta Mireia Gabilondo dira protagonistak. Ainara LeGardon musikariak egin du zuzeneko soinu bandak eta Maialen Sarasuak eszena janzten duten irudi ederrak. Aizpea Goenagak euskaratu ditu testuak.

Sorkuntza eszeniko ezohiko bat dugu hemen, bertan, hiru emakumezko aktore gizarte langile talde baten erraietan sartuko dira. Egunerokotasuna islatzen duten momentuen bitartez, indarkeriaren biktima diren emakumeentzako bi egoitzatako ("Larrialdi Egoeretarako etxe bat eta Abegi etxe bat)  bizitza biluztuko digute. Poema bilduma errukigabe honen egile den Mada Alderetek zazpi urtez egin zuen lan horrelako etxe batean hezitzaile gisa. Ainara LeGardon sortzaile eta interprete iradokitzaile eta inkonformistak eginiko zuzeneko soinu banda landuak eta Maialen Sarasuaren irudiek diskordantziaz beteriko ikuskizun bat osatzen lagunduko dute.

Infernu garaikideetan barrena egindako bidaia bat da funtsean antzezlanak proposatzen duena. Hiru gizarte hezitzaile arituko dira oholtzan hizketan, eta haien bizipenen bidez joango da ikuslea murgilduz genero indarkeriaren biktima izan diren emakumeentzako abegi etxe bateko eta larrialdi etxe bateko egunerokoan. "Ez da ohiko antzezlan bat izango", onartu du Fernando Bernues antzerki zuzendariak, «baina ez da errezital soila izango ere». Mada Alderete poeta espainiarrak 2007an kaleratutako poema liburua dago antzezlanaren oinarrian, eta haren eszenarako egokitzapena prestatu du Bernuesek.

Biktima izandako emakumeen bizipen gordin eta konplexuak biltzen dituzte Aldereteren poemek, eta berdin antzezlanak ere. Egileak berak dioen bezala, “egia penagarri honetan gezur bakarra, tamalez, erabilitako izen bereziak izango dira”.

Egoerarik estuenenean ere indarra ateratzeko gai den gizarte langile bitalistaren ahotsetik arituko da Vito Rogado aktoresa, esaterako. Biolentzia matxista bere larruan ezagutu duen gizarte langilearen ahotik arituko da Ainhoa Aierbe. Eta, azkenik, Mireia Gabilondorena izango da ahotsik analitikoena. Hiru aktore horiekin batera, Ainara Legardon musikaria ere izango da oholtzan zuzenean, eta Maialen Sarasuak antzezlanerako propio sortutako irudiak ere proiektatuko dituzte.

Beste urtebetez, badator Ordiziara Ahoz Aho Jaialdiaren barruan ospatuko den VIII. ipuinen ahozko narrazio lehiaketaren informazioa. Ordiziako Udalak eta Intujai teatrok elkarlanean antolatzen duten ekitaldia da, eta berriro ere, irekita dago nahi duen orok parte hartzeko. Izen ematea martxoaren 1a arte egongo da irekita.

Hemen dituzue izena emateko pausoak:

1. Email bat bidali behar da Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera, “IPUIN LEHIAKETA” izenburua jarrita.
2. Izena emateko datuak bete behar dira: parte hartzailearen izen abizenak, kontatuko den ipuinaren izenburua, ipuinaren egilea, posta elektronikoa eta telefonoa. 
3. Partaide bakoitzak 20 euro ordaindu beharko ditu seinale gisa, eta diru hori lehiaketa amaitu ostean itzuliko da.

ARAUAK

1. Profesional zein ez-profesionalek parte hartu ahalko dute.
2. Ipuinak 8 minutuko iraupena izango du gehienez ere, eta euskaraz narratu beharko da. 
3. Partaide bakoitzeko ipuin bat
4. Lehiaketak bi fase izango ditu: lehiaketako sailkapen gala martxoaren 7an izango da, larunbata, 19:00etan, D´elikatuzen. Bertan hiru finalistak hautatuko dira. Finala, berriz, martxoaren 27an izango da, 22:00etan, Barrena Jauregian. 

Sailkapen galan lehiaketako partaide guztiek parte hartuko dute, zozketaz ezarriko den hurrenkeran. Sailkapen galan hautatuko dira finalera iritsiko diren hiru finalistak: epaimahaiak bi finalista hautatuko ditu, eta beste bat publikoaren boto bidez. Finalean, berriz, epaimahaiaren erabakia eta publikoaren botoa batuta erabakiko da zein den irabazlea, eta baita bigarren eta hirugarren sailkatuak ere. Epaimahaiaren erabakia eta publikoaren botoa apelaezinak izango dira.

SARIAK

Lehenengo saria: 300 euro irabazleak, 200 bigarrenak eta 100 hirugarrenak.  Lehiaketa honetan parte hartzeak beraren oinarri guztiak onartzen direla esan nahi du, baita oinarri horietan jasotzen ez den aurreikusi gabeko edozein gertakariri buruz antolakuntzak hartzen dituen erabakiak ere. Parte hartzaileek oinarriak errespetatzeko konpromisoa hartzen dute. 

Informazio gehiagorako deitu 678990162 telefonora edo idatzi Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera. 

Otsailaren 10etik 15era bitartean Kaldereroak ospatuko dira Ordizian, eta horren barnean kokatuko da Zozomikote pertsonaia ere. Beste urtebetez, ilusio eta lan handiarekin atera dute aurrera egitaraua antolatzaileek, eta herritarrek ekintzetan parte hartzeko deia luzatu dute.

Lander Mujika, Ordiziako Udaleko kultura zinegotziak hala eskertu du herritarren parte hartzea: “badakigu lan handia egiten dutela ekitaldi sorta hau antolatzeko, eta oso eskertuta gaude hori guztiagatik. Horregatik, zuzenean edo zeharka Kaldereroetan parte hartu edo laguntzen duten guztiei eskerrak ematen dizkiegu Udaletik”. Erramun Amundarain, Kaldereroen Konpartsako kideak gaineratu du helburua “Kaldereroak ordiziarren festa” bihurtzea dela, denboran iraungo duena. Horrez gain, kontuan izan behar da Kaldereroek herriko eragileak omentzeko ere balio izaten duela, Urrezko Zozomikoteari esker. Hala, aurten lau izango dira errekonozimendu hori jasoko dutenak: Laguntasuna Errondaila, Ordiziako Saskibaloi Elkartea, Jai Alai Pilota elkartea eta Ordiziako Mendizale Elkartea.

EGITARAUA

• Otsailaren 10etik 15era Ordizian Elkarteak antolatuta, Dendaz denda Zozomikoteren bila
• Otsailak 11, asteartea: Zozomipotea auzoetan
• Otsailak 12, asteazkena: Zozomipotea erdigunean
• Otsailak 14, ostirala: 19:00etan, kalejira Ordiziako Musika Eskolako banda txikiarekin eta Azen Erraldoi Konpartsarekin.
• Otsailak 15, larunbata: 13:00etan, kalderero paseoa herrigunean Umore Ona abesbatzarekin, Laguntasuna Errondailarekin, Antxon Imaz eta Jose Ignacio Iturriozekin. 16:30ean, Zozomikoteren kanpamendua plazan. 18:00etan, Nikolas Lekuona plazan txupinazioa eta Zozomikote txikiaren pregoia Urrup antzerki taldearekin. Ondoren, Kalderero Konpartsako desfile mistoa. Plazara iritsita, Urrup antzerki taldeak Zozomikote pertsonaiaren ikuskizuna eskainiko du, eta, amaitzeko, zozomipotea egingo da plazan, Idiazabal Gaztaren dastaketa eta txotxa helduentzako, eta txokolatada pastekin umeentzako. 

Ostiralera bitartean irekita egongo da Zaporeak Gobernuz Kanpoko Erakundeak Barrena Jauregian jarri duen Duintasuna Elika Ezazu erakusketa. Greziako Lesbos uhartean errefuxiatuekin lan egiten dute, eta horien inguruko erakusketa jarri dute. Sarreran dago jarrita erakusketa, eta 09:00-13:00 eta 16:30 eta 20:00 tartean egongo da zabalik. Bestalde, ostiral honetan Tximista Sagardotegian bertso afaria egingo da eta eskuratzen den dirua Zaporeak-era bideratuko da. Emaneurre euskara elkarteak Udalarekin antolatu duen ekintza da. 

Hemen argazki batzuk: