Antzerki Garaia zikloak aurrera darrai eta ostiral honetan, hilak 17, El Gran Crucero antzezlana izango da ikusgai Herri Antzokian, 22:15ean hasita. Sarrerak salgai daude dagoeneko Barrena Kultur etxean, 12 euroan.

La Pescaderia Ambulante taldeak eskainiko duen lana da, eta bertan, Garikoitz Lariz aktore ordiziarrak parte hartuko du. Taula gainean izango dira berarekin batera Noe Lifona eta José Luis Guerrero aktoreak, beraiek dira eta antzezlanaren protagonistak. Lan honek Malagako Ateneo saria jaso zuen 2018an, lan original onenagatik. Ikusleak dibertitzeko asmoz, hiru gazteek egingo duten lehen bidaiaren nondik norakoak kontatuko dituzte, zerbitzu militarra bukatu ondoren. Hainbat ipuinek osatzen dute lana, eta protagonistek haien bizi-esperientziak kontatzen dituzte.

"Hawaiiko musika, Francoren zingirak, plastikozko kutxa bat, argizko gurutze bat eta zur eta alanbre linboan galdutako hiru militar. Osagai-nahasketa bat da, ikuslea bidaiarako prestatzen dutena, iraganeko gure historiako absurdu mingarrian barrena. Alkitranezko zeruertz batean, uniformezko hiru mamutxek gainean daramate etxea lubaki gisa. Balizaz baliza, eta ezarritako ibilbide-orriari jarraituz, zerbitzu militarra bete ondoren dagokien baimenera jotzen dute ezinbestean. Oporrak eskumuturrekoarekin. Mundu guztiak darama bere txartela? Akreditazioa? Ez ahaztu eskumuturrekoa. Gurutzaontzi Handia zuetako bakoitzaren eskura dago. Aukera hau alferrik galduko duzue? Eskifaia osoaren izenean, opor zoriontsuak opa dizkizuegu".

Oinarrizko eszenaratze batekin, hiru protagonisten lanean dago benetako indar-ariketa. Noe Lifona, José Luis Guerrero eta Gari Larizek gorputza eta arima uzten dute antzerki-lanean. Ariketa bizia eta, oso gogorra batzuetan, eta hiru soldadu hauen istorioak aurrera egin ahala lortzen dute ikuslea hunkitzea.

Gure Iragana elkarteak egindako artikulua Mexikoko aldizkari batean argitaratu dute

Ordiziako Udalak, Aldundiaren laguntzarekin batera, San Bartolome ermitaren indusketaren bigarren faseari ekingo dio aurtengo urtean zehar. Iaz hasi ziren bertan indusketa lanak, eta hainbat aurkikuntza egin ziren. 2020an jarraipena emango zaie lan horiei; asmoa da maiatza-ekaina bitartean egitea, besteak beste, ikastetxeen kurtso amaierarekin bat egin eta haur eta gazteenek lanak ikusi eta gure argibideak zuzenean jasotzeko gainontzeko herritarrekin batera.

Gure Iragana taldeak 7.780,30 euroko diru laguntza jasoko du, beraz, lanketa horiek burutzeko. Gaur egungo ermitaren mendebaldeko zatian 6x7 inguruko koadroa azaleran industea da asmoa, topatutako hormetatik hasi eta Elizaren ardatz nagusia kontuan hartuta, ipar aldeko erdia arkeologikoki agortuz.

San Bartolome ermitaren inguruko lan arkeologikoak 2018 urteko urrian hasi ziren. Josu Etxezarraga arkeologo eta historialariaren, eta Ander Arrese arkeologoaren gidaritzapean zenbait unetan. Aurkikuntza horiek nabarmenak izan dira, eta hedadura ere izan dute; hain zuzen, Mexikoko "Instituto Nacional de Antropología e Historia (INAH)"-k argitaratzen duen "Conservacion y Restauración" Aldizkariak "El origen olvidado de Villafranca- Ordizia. Ermita de San Bartolomé" izenburu duen Gure Iragana elkartearen artikulua ekarpen bikain modura baloratu du eta, dagoeneko mexikarrez idatzita aurki daiteke aldizkariaren 18. zenbakia formatu digitalean. Ale hau historiak eta antropologiak ondare kulturaren kontserbazioan eta zaharberritzean duten zereginari eskainita dago.

Link edo lotura honen bitartez dohainik deskargatu daiteke bai aldizkari osoa eta baita Gure Iraganak idatzitako artikulua (David Cano, Nerea Iraola eta Iosu Etxezarraga) PDF formatuan:

https://revistas.inah.gob.mx/index.php/cr

Bestalde, Osbele, Ordiziako San Bartolome Ermitaren Lagunak Elkartearekin duen hitzarmenarekin jarraituko du Ordiziako Udalak, ermita balioan jartzen jarraitu eta bertan ekintzak antolatzen jarraitu dezaten.

Bihar, abenduaren 24an, Eguberritako aparteko azoka izango da Ordizian. Hau da, urtean zehar Ordiziako Udalak antolatzen dituen azoka berezietanazkena; azoka berezi hau bikaina eta salerosketan mugimendu dezentekoa izango delakoan gaude, mahaiaren inguruan ospatzen ditugun jaietarako despentsa bete ahal izateko.

Bertako produktuak atsegin dituztenentzat, Ordizia osoa bihurtuko da orain ere azokaleku, erosle eta saltzaileen arteko elkargune. Hori guztia dela eta, Ordiziako Udalak, beste hainbat erakundeekin elkarlanean, erakusketak eta ekintza ugari prestatu ditu goiz ederra igaro ahal izateko, eta jai giroan murgiltzeko. Jai giroari dagokionez, trikitilariak eta dultzaineroak ibiliko dira kalerik kale, txoko guztiak animatzeko, eta ez da gabon kantarik faltako.

Goizeko lehen ordutik aurrera, Beti Alai pilotalekuan kapoi, antzar eta indioilar erakusketa izango da. Eta horien ondoan ez da faltako pottoka eta txahalik. Plaza Nagusian asteroko azoka izango da. Garagartza Plazan berriz, Euskal Herriko errege-sagar erakusketa izango da; baita bertako fruitu lehorren eta bestelako frutaren erakusketa ere. 

Ordiziako aparteko azoka zabal horretan eskuz landutako produktuek ere, bere lekua izango dute: foie-grasa, eztia, gazta, ogia, goxokiak,... Hori horrela, azoka osatuagoa izango dugu gabon jai hauei begira: Plaza Nagusian baserritarrek produkturik onenak eskainiko dituzte eta Garagartza Plazan eta beste kaleetan eskuz landutako gainerako produktuak.

IDIAZABAL GAZTA EKOIZLEEN AITORTZA EKITALDIA

Joan den urtean bezela eta aparteko azoka honen babesean, Idiazabal Gazta Jatorrizko Deiturak, Ordiziako Udala eta Idiazabal Gaztaren Kofradiarekin elkarlanean, ohore handiz, 2019 urtean zehar nazioarte mailan sariak irabazi dituzten gaztandegiei Esker Oneko Ekitaldia antolatu du. Saritutako gure gaztagileak Ordizian izango dira datorren asteartean, Udaletxe azpiko arkupean goizeko 11.00tan ospatuko den ekitaldian. Aurtengoan ere, Plaza Nagusian Ezkioko Agirretxeajatetxeko sukaldaria izango dugu “Ordiziako Azoka” pintxoak Idiazabal eran prestatzen inguratzen direnei banatzeko. 

“MARIANE” REN AURKEZPENA

D´elikatuz Elikadura eta Gastronomia zentroak 10  urte betetzearekin batera, azoka batzordetik lantzen ari zen ekimena martxan jartzea lortu zen 2015ean; Ordiziako kasko historikoaren tematizazioa, azokaren historian protagonista izan diren pertsonaien eskultura edo irudien bitartez, hain zuzen.  2015 amaieran Goizaneri eman zitzaion ongi etorria, gaztain egurrez eginiko emakume baserritarra eta Ordiziako Azoka Plazan kokatua Udaletxeari begira.  2017ko Artzain Egunean, Peru artzainaren txanda izan zen, Jakes etxean kokatzen dena,  besoan daraman arkumea lagun duela. 

Oraingo honetan, Mariane baserritarrari egingo diogu harrera, Ordiziako azokara, asteazkenero, bere ama eta amonak egin izan duten modura, “Oilo” kalean (egun Domingo Goitia kalea) jartzen den baserritarra eta otarra arrautza bete dakarrena. Hiru pertsonaia hauek Javier Arrieta eskultore zegamatarrak eginak dira Urkiri Salaverriaren aholkularitzarekin. 

Azoka bereziaren altzoan, goizeko 10.30tan Domingo Goitia kalean (Martinez Jatetxe parean) egingo da aurkezpena.

Datorren ostiralean, hilak 27an, Udalak antolatu duen Gabonetako programazioaren barruan,  “20000 legoa itsaspeko bidaian” antzezlana aurkeztuko da Herri Antzokian,  arratsaldeko 17:00etan, familian gozatzeko pentsatutako obra. Txalo Producciones enpresak Julio Verneren lan ezagunaren egokitzapena aurkeztuko du. Sarrerak aldez aurretik Barrena Kultur Etxean eros daitezke.

Haurrentzat eta familientzat zuzendutako lanak istorio berezia kontatzen du. Itsas munstro izugarri batek alarma guztiak piztu ditu; bale handiena baino handiagoa, ziztu batean igeri egiten duena eta kolore ezberdinetan itxuraldatzen den pizti honek ikara eta beldurra eragin ditu itsasoan dabiltzan mariñelen artean.  Ze pizti ikaragarri klase izan daitekeen ikertzera abiatuko zaigu itsasora Anorak, surflari trebe eta itsasozale amorratua.  Eta munstro baten partez, intentzio gaiztoko urpeko ontzia aurkituko du, gizadi osoa  arriskutan jartzeko moduko monstruoa. Nemo kapitainak gidatutako urpekontzi malapartatu-zitala.