Nazioarteko Korto Lehiaketa martxan egon da hilabete hauetan, eta asteburuan banatu dira bertako sariak. Kortorik onena Italiara joan da, Love is Love izeneko ikus-entzunezkoak jaso du 1.000 euroko ordainsaria. Lan honen zuzendaria Alessia Pischedda da. Publikoaren saria, berriz, Espainiako Down To Earth ekoizpenak jaso du, Cecs Noguerasen zuzendaritzapean, eta 300 euroko saria eskuratu dute. Goierriko egilea duen korto onenaren saria, berriz, Oianguren Institutuko Terapistak antzerki taldeak eskuratu du, Ausarta lanarekin eta 300 euro irabazi dituzte.

Aurtengoan, 165 korto jaso dira munduko 24 herrialdetatik: Thailandia, Taiwan, Frantzia, Belgika, Canada, Estatu Batuak, Mexiko, Venezuela, Angola, Senegal eta Australia, besteak beste. Ikuskapen komisio batek, 165 korto horietatik 15 korto hautatu ditu eta, ondoren, parte hartze prozesu bat eraman da aurrera eta Ordiziako 400 herritarrek eta hainbat eragilek, 11 korto onenak finalera pasatzeko aukeratu dituzte.

Azkenik, artea eta ikus entzunezkoen profesionalez (Teresa Calo, Asier Zinkunegi, Maider Bartolome) eta udal ordezkariez (Iñaki Hidalgo kultur teknikaria eta Lander Mujika udal zinegotzia) osaturiko epai mahai batek, eta publikoak irabazleak hautatu ditu.

Gipuzkoako Merkatarien Federazioko Harakin elkarteak, Ordiziako Udalarekin batera eta txerri-harakin eta harakin gremioaren laguntzarekin, Euskal Herriko XXII. Txistor-Lehiaketa  antolatu du Ordizian datorren asteazkenean, abenduak 18.  Plaza Nagusian, Udaletxeko arkupetan izango da, 10.30etatik aurrera. Kontsumitzaileen arreta bertako ohiko hainbat produktuetara bideratu nahi da Santo Tomas jaiaren atarian, hala nola, txistorra. Usadio zaharraren arabera egiten den produktuetako bat da, eta hori, zalantzarik gabe, garantiaz eta kalitateaz hitz egitea da. Aurten 50 partehartzaileen muga gainditu dugu, gehienak Gipuzkoatik, Nafar batzuk , Arabar bat eta aurtengoan bi Bizkaitar ere bai. 

Adituek esaten dutenaren arabera, txistorra ona izateko honako ezaugarriei  erreparatu behar zaie: neurria eta homogeneoa izatea, gustua, txikitua, giharra eta koipea erdibana, ontze-puntua, etab. Epaimahaikoek  lehenik eta behin produktu freskoak duen itxurari begiratuko diote: betetzerakoan berdina izatea, eskuz lotutakoa izatea, hestea, lodiera, eta abar. Ondoren, gordinik dagoela, txistorra ebaki eta giharra eta koipearen proportzioari erreparatuko  diote, baita haragiaren txikitzeari ere, eta, azkenik, zartaginean frijitu eta duen zaporea, usaina eta ahogozoa hartuko dituzte kontutan.

Hiru atal horietan lortutako puntuekin jakingo dugu zein izango den Euskal Herrikohogeitabigarren txapelketan garaile, eta hori egiaztatuko duen Txapela, garaikurra eta diploma jasoko ditu. Bigarren eta hirugarren sarituek garaikurra eta diploma jasoko dute eta epaimahaiak, gainera, beste bi diploma emango ditu.

Epaimahaia ondorengoek osatuko dute: Imanol Gaztañaga (Zubibi Jatetxea, Ordizia), Amaia Blazquez (Tximista Sagardotegia, Ordizia), Sonia Tapia (Fronton Jatetxea, Tolosa), Xabier Zabaleta (Jakitea Elkartea), Juanma Garmendia (Kattalin erretegia, Beasain), Rebeca Barainca (Galerna Jatetxea, Donostia), Jose Juan Castillo (Sukaldaria), Ramon Roteta (Sukaldaria), Jesus Mari Deba (Odolkigilea, Ezkio), Laura Tamayo (Basque Culinary Center-eko irakaslea), Aitor Buendia (Radio Euskadiko “La Ruta Slow” programako aurkezlea), Tere Madinabeitia (Goierriko Hitza / Diario Vasco).

Txapelketa-mota horiekin bertakoak diren produktuen aldeko arreta piztu nahi da, eta, aldi berean, kontsumitzaileek estimatzen duten kalitateko produktuak eginaraztea artisauei.

Txerri-hilketarekin lotzen da txistorra, eta oso erro sendoak ditu Euskal Herrian eta  Gipuzkoan batez ere, San Tomas eguna txistorraren eta txerriaren inguruan ospatzen baita. Usadioko txerri-hilketan gizonezkoen lana zen txerria hiltzea eta emakumezkoena berriz, gainerakoa, esate baterako, odolkiak, lukainkak...egitea, horretarako giharra txikitu eta gatza, piperbeltza eta abar botatzen zioten. Txistorra egiteko txerri-haragia eta urdaia behar da, gatza, baratxuria eta piperrautsa. Hori dena, ardi edo arkume-hestean sartu eta egurasten uzten da egun batzutan.

Abenduaren 11an, 19.00etan, Barrena Kultur etxean izango dira Gorka Landaburu eta Martxelo Otamendi, Oihana Sarasola eta Jon Ordoñez kazetariek gidaturiko mahai inguruan, bizikidetza, bakea eta giza eskubideen inguruan. 

Ordiziako Udaleko kultura sailak antolatuta, Tolosako Turismo Ekinbide Etxea eta Gipuzkoa Foru Aldundiaren laguntzaz, hogeitahamaikar urtez segidan, eta Tolosan egiten den Nazioarteko Txotxongilo Jaialdia aprobetxatuz, Ordizian egunotan Pavel Smid txekiar konpainia izango dugu herri Antzokian. Aurten konpainia bakarra bi ikuskizun desberdinekinekin egongo da.

Astearte honetan, eta goizeko saioan, Ordiziako ikastetxeei eskainitako saioan “Un cuento del viento” izeneko lana eskainiko du. Bi ume eta haize-errota bat protagonista dituen ipuina kontatzen du. Eta asteazkenean, 17:30etatik aurrera, eta jende guztiarentzat,  “Una clase del tiempo” izeneko ikuskizuna eskainiko du. Ikuskizunak irakasle oso bereziaren istorioa kontatzen du, aspalditik munduan zehar denborari buruzko eskolak ematen dabilena.