Atseden hartzeko eskubidea eta balkoietako musikaren arteko oreka bilatzeko jarraibideak

COVID19 birusak eragindako larrialdi egoerak ekarri duen konfinamendua hasi zenetik herriko hainbat auzotan balkoietako ekintza-musika kontzertuak ohikoak dira, eta herritar askok biziki eskertzen dituzte, egoera eramangarriagoa izan dadin laguntzen dutelako, eta auzo bakoitzeko komunitateak indartzen dituelako.

Hala ere, kontutan hartu behar da ordiziarrak bizitzen ari garen errealitateak anitzak direla, ospitale eta egoitzetan lehen lerroan lanean jarraitu dutenak, gaixo daudenak edo familiako kideren bat galdu dutenak, esaterako. Horregatik, Ordiziako Udaletik herritarrei zentzuz eta enpatiaz jokatzeko eskatzen dizuegu. Egoera honetan oreka lortzen saiatu behar gara, balkoira bizilagunekin musikaz gozatzera ateratzen direnen eta atseden hartzeko beharra duten herritarren artean.

Oreka lortzeko jarraibide hauek ematen ditu Ordiziako Udalak:

• Balkoietako musika eta jardueren denbora mugatzea:

• Astean zehar, arratsaldeko 20:00etako txaloen aurretik edo ondoren, gehienez 30 minutuz.
• Ekintza edo jarduera bereziak asteburuetara mugatuko dira, larunbata edo igandean, egun bakar batez, gehienez ordu eta erdiko iraupenarekin, eta amaitzeko arratsaldeko 20:30etako mugarekin.

• Musikaren bolumena kontrolatzea. Horretarako antolatzaileek beraiekin harremanetan jartzeko moduak argi adieraziko dituzte (telefono zenbakiak, whatsapp taldeak, etab.)
• Kexak jasoz gero, identifikatu egin beharko dira kexa-jartzaileak, eta kexaren xehetasunak azaldu beharko dira.
• Udaltzainek zarata-mailak egiaztatu ahal izango dituzte, eta itzaltzeko edo zarata mugatzeko eskatu ahal izango dute, ikusita kasu bakoitzeko egoera zein den.

Ziur gaude guztion artean gai izango garela aisialdirako eta atseden hartzeko eskubideak errespetatzeko. Elkar zaindu gaitezen.

Ordiziako D´elikatuz gunean  eman zaio 2020 Ahoz aho jaialdiari hasiera. Bertan VIII Ahozko Narrazio Lehiaketa izan da. Lehiaketari hasiera eman aurretik CIA.KICIRKE ikuskizunak girotu du bertako giroa, umore puntu ederra jarriaz bere instrumentu sorta bereziarekin.

Aurkezle lanetan Ane Gebara kontalaria aritu da eta sei partaide izan dira lehiaketan. Xabier Gonzalez (Barakaldo), Leire Zinkunegi (Orio), Ane Arrugaeta (Gasteiz), Ester Poveda (Berrobi), Joxe Aldasoro (Etxarri-Aranatz) eta Aitziber Sampedro (Orendain).

Hauek izan dira lehiaketara aurkeztutako ipuinak: Zurginaren ipuina / Olatua / Beti bezala, ezer Ez! / Nire maletaren ipuinak / Arotza eta Lama/ Imajinatu. Bakoitzak bere ipuina modu propioan defendatu du eta kontatzeko estilo ezberdinak ikusteko aukera ederra izan da.

Epaile lanetan Iñaki Carretero, Itziar Rekalde, Irati Goikoetxea, Imanol Arabaolaza, eta May Gorostiaga aritu dira. Publikoak ere izan du bere iritzia emateko aukera, ikusle guztiek boto bana zuten gehien gustatutako ipuinari emateko, modu horretara zuzenean sailkatuz partaideetako bat.

Publikoaren botoak eta epaileen puntuaketak kontatu bitartean CIA.KICIRKE ren malabareetaz gozatzeko aukera izan da.

Finalerako pasea Ester Povedak, Ane Arrugaeta eta Joxe Aldasorok lortu dute. Hiru partaide hauek izango dira Martxoaren 27an Ordiziako Barrena Jauregian egingo den Ahozkotasunaren Gala Nagusian, aurtengo kalabaza jasotzeko lehian harituko direnak.

Giro politean eman zaio hasiera aurtengo Ahoz Aho jaialdiari. Hitzez idatziak baino ahoz aho ipuinak jasotzeko aukera ugari izango da Martxoaren 7 tik 28ra. Jaialdia hasi besterik ez da egin.

Datorren ostiralean, martxoaren 6an, Barrena Kultur Etxeko Erakusketa Aretoan Euskal Akuarelarien Elkarteko erakusketa inauguratuko da. Bertan 30 artisten lanak izango dira ikusgai. Erakusketa datorren martxoaren 27ra arte egongo da zabalik, arratsaldero 18:00etatik 20:00etara; igande eta jai egunetan itxita egongo da.

Ostiral honetan inaugurazioa ekitaldia izango da, eta erakusketan parte hartzen dituzten artistak bertan izango dira. Ekitaldi horretan, 18:00etatik aurrera Juan Carlos Aresti artistak akuarela sortzeko prozesua erakutsiko du barrena Kultur Etxeko batzar aretoan eta segidan (19:00) erakusketa inauguratuko da.

Euskal Akuarelarien Elkarteak, bere ibilbide luzean, sistematikoki lan ederra egin du akuarela margo munduan dagokion tokian izan dezan. Hori lortzeko, elkarteak ekintza ugari eta anitzak antolatzen ditu: formazio klaseak, erakustaldiak, tailerrak, master class, eta erakusketa ugari bai Euskadin, zein Espaina eta Europa mailan. Horrez gain, hainbat topaketatan eta sinposiotan ere parte hartzen du Euskadin egiten den akuarela hedatzen.

Barrena Kultur etxean aurkezten den erakusketa honek formatu handiko 30 obra ditu, guztiak akuarelaz eginak, baina egiteko era, adierazitako gaiak, sentsibilitate eta joera artistiko oso ezberdinetakoak dira. Erakusketa hau bisitatzen duten pertsonek egun Euskadin egiten ari den akuarelaren erakusgarri diren artelanekin gozatu ahal izatea, da Elkartearen nahia.

Beraz, talde erakusketa honetan artista bakoitzaren aldaera libre eta aberatsa ikusi ahal izango da, gaietan eta baita pintura-estiloetan ere. Horrekin batera, atsegina da obren bukaerako emaitza ikustea, izan ere, teknika honetan paperaren gainean ura eta pigmentuak erabiltzen jakin behar da; eta zailtasun hori gaindituta agertzen da emaitza.

Adiskidetasun eta afektuei buruzko komedia zuzena 22.15etan hasiko da, Herri Antzokian. Sarrerak Barrenan daude salgai

Ostiral honetan, martxoaren 6an, Ordiziako Herri Antzokian Antzerki garaia programaren bostgarren emanaldia izango da ikusgai, Txalo Produkzioak aurkeztuko duen Ene ba!! lanarekin. Antzerki garaia egitaraua Beasain eta Ordiziako Udaletako Kultura Sailek bultzatu eta antolatu dute, Gipuzkoako Foru Aldundiaren eta Euskadiko Antzerti sarearen lankidetzekin.

Asier Sota, Ane Gabarain, Mikel Laskurain, Joxe Kruz Gurrutxaga eta Susana Soleto dira komedia barregarri honen protagonistak, Begoña Bilbaoren zuzendaritzapean.

Bixente da istorio honen protagonista, bera eta Ana, bikotekidea, guraso izango dira eta ospatzeko, koinatuaren etxean afari bat egitea erabaki dute familiako beste lagun batekin batera. Gure protagonistak aita izan behar du lehen aldiz. Aitatasuna ospatze aldera, bere arrebarekin eta koinatuaren etxean afalduko du, familiako beste lagun batekin batera. Ana, bere bikote eta ama‐gaia, berandu iritsiko da afarira. Afaltzen hasi baino lehen, ama zain daudela, aitatasunak sortzen dituen poztasun eta aldarte onak izango dituzte hizpide, ume jaio‐berriari jarri behar dioten izena aditzera emango duen arte. Egundoko kalapita sortuko du izen berak eta eztabaidaren suak bildutakoak erreko ditu, etxeko giroa erabat gaiztotu arte… Ene bada! Trumoi hotsak eta txinpartak, baina guztia umore ikuspegi batetik atonduta.