Mou Dansa konpainia valentziarraren obra azaroaren 20an, ostirala, izango da, arratsaldeko 17:00etan, Herri Antzokian, eta SETEM, Calcuta Ondoan eta Ikertze elkarteek Ordiziako Udalarekin batera bultzatzen duten 'Harimakila-tik ihesi' proiektuaren barruan kokatzen da.

Datorren azaroaren 20an, ostirala, Mou Dansa Valentziako konpainiaren #outFit dantza ikuskizuna izango da Ordizian. Modaren industriarekin lotutako ikuskizuna izango da, 17:00etan Herri Antzokian. Sarrera doakoa da. Gonbidapenak Barrena Kultur Etxean banatuko dira.

Ikuskizuna SETEM Hego Haizea, Calcuta Ondoan eta Ikertze Kultur Elkarteak Ordiziako Udalarekin batera abian jarritako 'Harimakila-tik ihesi' proiektuaren barruan dago.

Lana SETEM-en ideia batetik abiatu zen, eta modaren munduaren esklabismoari buruzko hausnarketa hartuta -arropa ekoizpenaren nahiz kontsumoaren munduan- lengoaia eszeniko desberdinekin egindako esperimentazioaren emaitza da. #outFit dantza ikuskizunak, zehazki, arropa-kontsumoaren eta, oro har, kontsumoaren inguruko sentimendu kontraesankorra planteatzen du. Jessica Martin, Isabel Abril Fernández, Isabela Alfaro, Abel Martí eta Sergio Navarroren zuzendaritzapean egina dago.

Lanaren sortzaileen arabera, #outFit "jantzi eta osagarrien konbinazioa da, denboraldiaren eta ekitaldi sozialaren arabera aukeratzen duguna. Abagune askotarako udako outfitak daude: festetara joateko, ezkontzetara, negozioetarako, norbaiteko elkartzekoak egiteko, hondartzan gauez, lanerako, nire ehorzketarako... Arroparako dugun desio sutsuak miseria egoerak sortzen ditu munduko beste leku batzuetan. Nola kudea dezakegu errealitate hori aurkitu dugunean? Lau gizabanakok, gau batean parrandan doazenek, oso ondo aukeratu behar dute outfit-a, agian uste dute aukera horretan dutela jokoan bizitza".

Harimakila proiektua

Jarduera hori irailaz geroztik Ordizian garatzen ari den Harimakila proiektuaren parte da, eta Asiako ehungintzako langileek jasaten duten giza eskubideen urraketaz sentsibilizatzea du helburu, Arropa Garbia Kanpainak proposatutako balioetatik abiatuta.

Calcuta Ondoan, Ikertze Kultur Elkartea eta Setem Hego Haizea elkarteek bultzatutako proiektua da, Ordiziako Udalaren eta Garapenerako Lankidetzaren Euskal Agentziaren laguntzarekin. Proiektuak "Harimakila-tik ihesi" ihes-aretoa du Cartonajes Nadalen azaroaren amaierara arte, eta programazioaren barruan hainbat jarduera osagarri garatu dira, #outFit, esaterako. Proiektuari buruzko informazio gehiago bere webgunean kontsulta daiteke: https://www.harimakila.org/.

Informazio gehiago?

Jon Narváez López de Aberasturi

Komunikazioa

Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.

SETEM Hego Haizea

Tel.: 945 120746 / 659682431

www.setem.org/euskadi

Barrena jauregiko aretoa izan zen AHOZ- AHO jaialdiko gala nagusiaren eta VIII Ahozko Narrazioaren Lehiaketaren gune. Bertara jende ugari gerturatu zen eta bertan sortu zen giro onaren konplize izan ziren.

Martxoaren 7an hasi zen lehiaketa Ordiziako D´elikatuz gunean eta ondoren pandemiarengatik jaialdia bertan behera gelditu zen. Lehiaketan izen eman zuten 6 partaideetatik 3 pasatu ziren finalera, Ester Poveda Quiles, Ane Arrugaeta Tome eta Joxe Aldasoro Jauregi. Beraiek eman zioten hasiera galari, euren narrazioak bertaratutako publikoarekin partekatuz.

Segurtasun arrazoiengatik aurten ez zen publikoaren botorik izan eta azken epaiketa Ane Gebarak, Arrate Leundak eta Ainhoa Jimenezek osatutako epaimahaiaren esku egon zen.

Botoak zenbatzen ari ziren bitartean, epaimahaikideak eta May Gorostiaga aurkezlea pasa ziren oholtzatik, eta entzuleek narratzaileen lan onaz gozatu zuten.

Zenbaketa egin ondoren, emaitzak hirugarren postua eman zion Gasteizko Ester Povedari, bigarren Berrobiko Ane Arrugaetari eta VIII. Narrazio Lehiaketaren irabazlea Etxarri-Aranatzeko Joxe Aldasoro.

Giro polita ipuinak entzuten, ikusleen artean gozatu izanaren aurpegiak nabari ziren eta ipuin gehiago entzutearen gogo grina piztua ere bai. Ba al da AHOZ- AHOko jaialdiaren aurtengo edizioari bukaera emateko modu hoberik?

Antolatzaileek bereziki eskertu nahi die Ordiziko eta Tolosako Udalei urte berezi honetan egindako esfortzuagatik eta emandako babesagatik.

Kultura segurua da. Ipuinak ez dira geldituko...

Igandea 15 – 16:30. Herri Antzokia.  "Salto! Sorkuntza" taldearen eskutik  "Lau"antzerki  lana.

Aurten, Barroko Aire zikloaren osagarri berezi gisa, haurrentzako eta familientzako programa berezi bat sortu da, "Barroko Txiki" izenekoa, eta datozen zikloetan jarraitzeko asmoz sortu dena. Horrela, bada, jende guztiarentzat, baina bereziki 3 eta 8 urte bitarteko haurrentzat, zuzendutako antzezlan familiar bat ere programatu da. Musikatik abiatuta egindako kontakizuna da, Vivaldiren "lau urtaroak" lanean oinarritua, eta Salto Sorkuntzak taldeak ekoitzi du.

 Vivaldiren partitura ospetsua abiapuntu bezala hartuta, istorio    honetako narratzaileak eskutik hartu eta lau urtaroetatik bidaiatzera eramaten gaitu. Musikak natura iradokitzen digu: geogralia, klima, usainak, zaratak... Eta gorputza, egoera bakoitzari lotuta doakion emozio eta gertaerei egokituz adierazten da, abentura eta gertakari ezberdinetan murgilduz. Jantzi eta objetuen bitartez, eraldaketa harrigarriak lortzen ditugu, beti ere irudimenarekin jostatuz. Objetuek bizitza ezberdinak dituzte; bufanda bat ez da soilik bufanda bat...

Hitzekin ere jolasten dugu, eta poesiak badu bere lekua. Haikuen bitartez, pertsonaiak momentuaren edertasuna harrapatu eta helerazten dio publikoari.

Unibertso zabal bat da LAU; denbora laburrean istorio bat beste baten barruan eta horren barruan beste bat kontatzen diguna... Txikitxoei atentzioa lapurtuko dien sorkutza bitxia eta dibertigarria, beraien zentzumenak sustatu eta beti erne mantenduko dituena, partaidetza aktiboa bultzatuz.

Salto! Sorkuntzak egitasmoa Marta Urcelayk eta Leire Uchak bultzatutako egitasmoa da.Arte eszenikoen munduan urte askotan ibiliak dira, bai antzerki, telebista edo zineman, beraiek sortutako laneki edo beste konpainia batzuekin lan eginez.

Lau haurrentzako ikuskizuna da, Lau hitzak dira, Lau musika da, Lau antzerkia da eta sentsazio mundu bat deskubritzeko aukera bat da, Vivaldiren "lau urtaroen" musikaren bidez.

Emanaldia igande honetan izango da, Herri Antzokiaren haurrentzako ohiko saioaren barruan; kasu honetan, ohiko ordutegian ordu laurden bat aurreratuko da, eta saioa 16: 30ean hasiko da. Sarrerak salgai Kutxabank-sarrerak eta Herri Antzokian bertan.

Udalak eta Gipuzkoako Foru Aldundiak antolatutako Barroko Aire kontzertu zikloarekin jarraituz, igandean, hilak 15, Ordiziako Parrokia Elizan, arratsaldeko 6:30etan, bigarren kontzertua entzuteko aukera izango dugu, BABX (Behi bideko Andere xuriak)  eta Lau Sasuak taldeen eskutik.

Baionako Arranoa laukoteak eta Ipar Euskal Herriko beste hainbat musikarik osatzen dute Lau Sasuak. “Arranoa taldeko Marina Beheretxe biolin jotzaileak sortu zuen proiektua, eta Antonio Vivaldiren Lau urtaroak euskal maneran, euskal saltsan egitea zen asmoa. Biziki ikuspegi argia behar zuen, eta bazuen”, esan du Mikel Etxekoparrek, proiektuko txistulari eta kantariak. Berak, dena den, zalantza ugari izan zuen hasieran. “Oso ezaguna da Vivaldiren lana, eta nik Marinari esaten nion Vivaldik ez zuela gure beharrik Vivaldi eta eder izateko, baina berak argi zuen baietz”. Beheretxek “oso ongi” ezagutzen ditu Vivaldiren obra eta Lau urtaroak sortu zeneko garaia, barrokoa. “Garai hartan, musika egiteko manera ez zen mende bat geroago egiten zena bezalakoa, eta hori oso ongi menderatzen du Marinak”.

Obra bera eta testuingurua ezagututa, “euskal manerara” ekarri zuten lana, eta hori eskainiko dute kontzertuan. “Ahozkotasuna sartu dugu, inprobisazio batzuk ere bai… Espiritu berriarekin, garai hartako espiritua berreskuratzen saiatu gara”, azaldu du txistulari eta kantariak. “Euskal instrumentuak ere sartu ditugu. Nik ezagutzen ditut hemengo kantagintza, txirula eta ttun-ttuna, eta horiek sartu ditugu; baita bertsoak ere”. Louis Ligetx koblakari eta idazle zuberotarrak Lau sasuak bertso sorta idatzita dauka. “Eta horiek ere berreskuratu ditugu. Horregatik deitu diogu Lau sasuak eta ez Lau urtaroak. Ahotsa, ttun-ttuna, txirula, txistua, txalaparta eta panderoa sartu ditugu hari laukotearekin batera”.

Vivaldiren obra “errespetatu” dutela dio Etxekoparrek, eta lan horretako hamabi mugimenduak jotzen dituztela eurek ere. “Urtaro bakoitzak hiru mugimendu ditu, eta hamabiak eskaintzen ditugu gure emanaldian. Ligetxen bertsoekin hasten gara”. Lau urtaroak izaki, naturarekin lotura daukaten doinuak ere izango dira entzungai. “Txorien txistuak, ardien zintzarriak, baserri munduari lotutako hainbat soinu… Vivaldiren hamabi mugimenduez, Zuberoako hainbat kanta ere jotzen ditugu.”

Vivaldiren "Lau urtaroak" lanaren bertsio original horren osagarri, BBAX- Behi bideko Andere xuria taldea ere arituko da. Marie Hirigoien Bidart, Mirentxu Agerre, Pantxix Bidart, Paxkal Indo eta Allande Etxeberrik osatzen dute taldea, eta taldeak a capella proiektu berri baten lanak erakutsiko ditu. Taldeak Allande Oihenart zuberotarraren XVII. mendeko olerkiak aukeratzen ditu errepertorio berria sortzeko oinarri gisa.

Aurreneko kontzertuan bezala, edukiera mugatua izango da, dagozkion segurtasun-neurriak bermatzeko eta kontzertuetarako gonbidapenak jaso behar dira Barrena Kultur Etxean (943805630).