Kontxita Mujikak utzitako bi argazki ekartzen ditugu oraingo honetan gure txokora. Garagartza Plazako (“Prazuelan”) goiko izkinanzegoen Karmeldar mojen San Jose Ikastetxeko ikasleetako bi talde dira eta oso ondo dokumentatuta (izen bakarra falta da aurreneko argazkian), bata 1956-57 kurtsokoa eta bigarrena talde bereko ikasle batzuk urte pare bat edo geroxeago. Oroitzapenak ekarri dizkizute gogora argazkiek? Partekatu nahi dituzu?

Erdi Aroko azokaren XXII. edizioa egingo da larunbatean eta igandean Plaza Nagusian eta haren inguruetan

Ordiziako Alde Zaharra edo gune historikoa, berriro ere Erdi aroko edo Aintzinako periaren eskenatokia bihurtuko da. Aurten XXII. edizioa ospatuko da, ‘Aintzinako Periak’ goiburupean. Maiatza helduta eta Artzain Egunaren arrastoak galtzeko denborarik eman gabe, berriro ere aparteko azoka batean murgilduko da Ordizia. Azoka berezia benetan, larunbat eta igandez, hilak 13 eta 14, Ordiziara bisitari ugari ekarriko duena. Ordiziako Plaza Nagusia eta bere inguruak itxuraz aldatuko dira eta Erdi-aroko kutsua izango duen giroa sortuko da, jolas eta kulturako kutsua duen azoka egiteko.

Azken 21 urte hauetan, Napar Bideak-ek, Nafarroako Artisau Elikagai Elkarteak, ofizioetako artisauek, Ordiziako Udalak eta gu bisitatzera etortzen den jendeak Ordizian antolatu dugu gure “Antzinako Azoka”.

Ordizia azokaren erreferente izan da, horrez gain, baserriko produktuaren eta bertako produktuaren erreferente ere izan da.

Datorren ostegunean, maiatzak 11a, izango da bilera, 19:00etan, Udaletxean

Ordiziako Udaleko Jai batzordeak bilera baterako deia egin die herriko kuadrillei Santa Ana jaiei begirako hainbat gaiei buruz hitz egiteko. Bilera datorren ostegunean izango da, 19:00etan, Udaletxeko Batzar Aretoan. Honako gaiak tratatuko dira: iazko jaien balorazioa, 25eko gaupasa eta goizaldeko danborrada (matutina), Kuadrillen eguna eta festetako programa. Bileran hartuko diren erabakien garrantzia ikusita, dei berezia egiten zaie kuadrillen ordezkariei bileran parte hartzeko.

Beatriz Gallego Muñozek “Mujeres y trabajo en Ordizia (1880-1980): una perspectiva de género” ikerketa lana burutuko du.

“Mujeres y trabajo en Ordizia (1880-1980): una perspectiva de género” da aurkeztutako lanaren izenburua, eta Victor Mendizabal IV. Ikerketa Beka burutzeko aukeratua izan den lana. Ikertzaileak lana burutzeko urtebeteko epea eta 7.000 euroko laguntza izango du. Hiru lan aurkeztu dira Ordiziako Udalaren Kultura Sailak antolatu duen laugarren  deialdi honetan.

Gizarte zientzien, natur zientzien eta humanitateen arloko ikerketa bultzatzea da bekaren xedea, Ordizia eta ordiziarrak erreferente izanda, irabazi duen lanak deskribatzen duen moduan. Joseba Aranburu Ordiziako Kultura zinegotziak, Ana Leturia EHUko irakasleak, Jesus Mari Gaztañaga Goierri Fundaziokoak, eta Patxi Garmendia historiagile eta irakasleak osatutako epaimahaiak, deialdiko oinarrietan zehaztutakoaren arabera, kalitate zientifikoa, originaltasuna eta egilearen ikerketarako gaitasuna baloratu dituzte, eta deialdiaren helburuak lortzeko zein ekarpen egiten duen.

Nagusitu den ikerketa-lanaren helburua da Ordiziako emakume langileen papera edo egitekoa aztertzea industrializazio prozesuaren etapa desberdinetan eta udalerriari egin zioten ekarpen ekonomiko eta soziala azaleratzea.