Image
Image

Garapen iraunkorra eta mugikortasuna

ARABAKO KALEKO LORATEGIKO AUZOKONPOSGUNEKO KONPOSTA ATERATZEKO EKITALDIA

2014-09-25 konpostBihar ostirala, hilak 26, auzokonposgunean bertan izango da ekitaldia, 18:00etan

Hondakinen prebentziorako bidean, 2013ko udaberritik zelai partikularrik ez duten etxeek konposta egiteko aukera daukate Ordizian. Herriko lehen auzokonposgunea Araba kaleko lorategian jarri zen iazko apirilean, eta ordudanik, 14 familia aritu dira etxeetako hondakinen zati organikoa bota eta lantzen. Urte eta erdiren ondoren, lehen konposta ateratzen moduan dira dagoeneko. Bihar ostirala, hilak 26, dagoeneko helduta dagoen konposta erakusteko ekitaldi bat egingo da auzokonposgunean bertan, 18:00etan, eta Sasietako teknikari batek konpostaren kalitateari buruzko informazioa emango die familia horiei eta inguratzen diren herritarrei. Lortutako konposta laborategira aztertzera bidali du Sasietak, eta maila goreneko konposta (A maila) ateratzea lortu dute. Konpost hori eskuragarri utziko zaie gunean bertan, nahi dutenean har dezaten.

Garapen iraunkorra eta mugikortasuna

ALTAMIRAKO PUTZURA IRTEERA LARUNBAT GOIZEAN

2014-09-24 putzuaAranzadi Zientzia Elkarteko Herpetologia saileko Ion Garinek gidatuko da saioa. Hitzordua 10:00etan da, Oianguko sarreratik abiatuta

Larunbat honetan, hilak 27, Altamirako putzura irteera antolatu du Aranzadi Zientzia Elkarteak, Oiangu parkearen kontserbaziorako eta ingurumen sentsibilizaziorako Ordiziako Udalarekin urte hasieran abiatutako lankidetzari jarraipena emanez. Aranzadiko Herpetologia saileko Ion Garinek gidatuko du saioa, eta besteak beste, horrelako ekosistemek biodibertsitatearen kontserbazioan duten garrantziaz hitz egingo du irteeran zehar. Altamirako putzuaren errestaurazio lanak ekainean egin zituzten Aranzadiko Botanika saileko kideek. Larunbateko irteera parkearen sarreratik abiatuko da, 10:00etan.

Garapen iraunkorra eta mugikortasuna

URRIAREN 1EAN JARRIKO DA INDARREAN ALDE ZAHARRERA SARTU ETA IRTETEKO KONTROL SISTEMA BERRIA

2014-09-15 kontrolaHamabost eguneko frogaldi epe bat irekiko da bihar, erabiltzaileek sistema ezagut dezaten

Urriaren 1ean jarriko da martxan Ordiziako Alde Zaharrera sartu eta bertatik irteteko kontrol sistema berria. Sistema berri honek autoen matrikulak irakurtzen ditu, orain arteko pilonak jaitsita mantentzea baimentzen du, eta horri esker, oztopo fisikoa desagertu egiten da, edozein ezbehar edo arazoa egonez gero sarrera bermatuta egoteko. Sistema berria ofizialki martxan jarri aurretik, hamabost eguneko frogaldi epe bat egongo da bihartik aurrera (hilaren 16tik 30era), erabiltzaileak sistema berrira ohitu daitezen. Iban Asenjo Ordiziako Udaleko Garapen Iraunkor eta Mugikortasun zinegotziak, eta Aitor Escalante udaltzainburuak eman dute gaur sistema aldaketaren berri.

Garapen iraunkorra eta mugikortasuna

ORDIZIA KALEA TRAFIKOARI ITXITA EGONGO DA ASTELEHENEAN

2014-09-04 ordiziakaleaZirkulazio guztia Sanperio kaletik desbideratuko da, eta autobusak ere ez dira pasako herrigunetik

Urdaneta kaleko lanak direla eta, Ordizia kalea trafikoari itxita egongo da datorren astelehenean, hilak 8. Bidea 08:00etan moztuko da, eta iluntzera arte ez da irekiko. Hori dela eta, trafiko guztia Sanperio kaletik desbideratuko da, eta autobusak ez dira pasako herrigunetik. Urdaneta kalearen erdia oinezkoentzat bihurtzeko lanak iraileko azken asterako bukatuta egotea espero du Ordiziako Udalak.

ORDIZIAKO UDALA

Udala 943 88 58 50

Udaltzaingoa 943 80 56 16

E-posta arretabulegoa@ordizia.eus

Kale Nagusia, 24 · 20240 Ordizia (Gipuzkoa)

KOMUNIKAZIOA

Tel 688 81 75 83

Tel 688 71 54 66

E-posta komunikazioa@ordizia.eus

Jarraitu gaitzazu sare sozialetan.

iconrssiconfacebookicontwittericonyoutubeiconinstagramiconflickr

OHAR LEGALA

Lege oharra

Pribatutasun politika

Cookie politika

logo ordizia footer

logo ordizia bizi herria

Image
Image
Image