Ordiziak aparkaldi mugatuko gunea du Eskarabilla auzoan, eta hainbat kaleri eragiten die neurri honek. Espazio hau jarri zenean 201 plaza bideratu ziren helburu horretarako eta aparkatzeko muga 20:30etatik 09:30era jarri zen, astelehenetik ostiralera, baimenduetako bizilagunentzat. Goizeko 9:30etatik iluntzera (20:30) eta asteburu zein jai egunetan ordea gune gorri hori parking librea izango da. Kale hauetan bizi diren herritarrek eskatu dezakete txartela: Urdaneta, Maribaratza, Diego Rivero, Goierri, Berria eta Joseba Rezola, eta Kale Nagusia 1etik 11ra eta 2tik 22ra; Andre Mari kalean 3tik 19ra; Goenkalen 1etik 9ra eta 2tik 8ra, eta, azkenik, Joaquin Jose Arteaga kalean 1 eta 2.

Martxan jarri zenetik herritarrek bertan aparkatu ahal izateko egoiliar txartela ateratzeko aukera izan dute azken hilabete hauetan, batzuek txartela jaso zutelarik. Baina txartela 2020 urterako zen eta orain berriak banatuko dira bihar hasita, osteguna, Udaltzaingoan. Martxoaren 5a bitartean jasotzeko aukera egongo da, aipatutako bulegoan 08:00etatik 20:00etara bitartean. Orain arte, 500 eskaera inguru jaso dira eta beste norbaitek egin nahiko balu, eskaera horiek Udaltzaingoan egin daitezke.

Hala, txartel hori dutenek aparkaldi mugatuko lekuan aparkatzea baimenduta izango dute. Gainontzekoek, ezingo dute txartela izan gabe bertan aparkatu eta honako ordutegia errespetatu beharko dute: 20:30etatik 09:30etara.

Oraingoz, doan

Pandemia eta inguruan egiten ari diren etxe berrikuntzak eta horiek sorrarazi duten aparkantu galera direla eta 2020ko martxoan gune gorriarentzako erabakitako erabilera bertan behera geratu zen eta horrekin batera ordaintzeko obligazioa. Denbora tarte honetan txartela eskatu duten pertsonei ez zaizkie ordenantzak jasotzen duen ordainketa tramitea egiteko behar diren datu guztiak eskatu beraz orain txartel berriaren bila etortzen direnean falta diren datuak eskatuko zaizkie, eta kontu korronteko zenbakiaren ziurtagiria ere eraman beharko dute (kontuaren titularra bakoitza dela ziurtatzen duena, Garrantzitsua da guztiek informazio hori eramatea, bestela ez dira txartelak entregatuko.

Oraingoz aparkaldi mugatuko guneko txartela ateratzea doakoa izan da, baina aurrez onartu moduan, ordaindu egin beharko da. “Oraingoz behintzat doakoa izaten jarraituko du, Pandemia eta inguruan egiten ari diren etxe berrikuntzak eta horiek sorrarazi duten aparkantu galera direla eta. Baina aurrez udalbatzan onartutako ordenantzak jasotzen duen moduan, etorkizun batean ordaindu egin beharko da txartel hau izateagatik”, azaldu du Maitane Alvarez alkateordeak. Gainera, banatuko diren txartelak ez dira 2021 urtean bakarrik erabiltzekoak izango; oraingo txartelak ez du epe mugarik izango; iraungitze datarik.

Ostegunean, arratsaldeko 18:00etan, Udaletxeko batzar aretoan 'Eukaliptoen eragina ingurumenean' hitzaldia eskainiko dugu, Arturo Elosegi adituaren eskutik. Zuzenean jarraitu ahalko duzue Youtubeko Udalaren kanalean.

“Nikel isurketen aurkako neurriek emaitza onak eman dituzte. Orain, jarraipena egitea beharrezkoa da”

Ordizia eta Zaldibiako udal ordezkariak Eusko Jaurlaritzako Ingurumen Saileko zuzendari den Javier Agirre eta Saioa Ferro teknikariarekin elkartu dira bilera telematiko bidez ostegun goizean, otsailaren 4an. Orain hilabete batzuk bi herrietan egindako neurketetan airean Nikel partikulen presentzia altua atzeman zen. Horren harira, hainbat neurri hartu dira eta emaitza horiek ezagutzera eman dizkigute, 2-3 aste barru publiko egingo dituelarik Eusko Jaurlaritzak.

Gaia ez da hilabete hauetako kontua. 2016an dagoeneko atzeman zen airean Nikel kopuru altua Ordiziako neurgailu batean, eta 2018ko urte amaierako datuak berriro altuak atera ziren. 2019ko azken hilabeteetan neurtu zen Zaldibian lehenengo aldiz, han ere balio altuak topatuz.

Arazo honen aurrean, jarraipen zorrotza egin zaio gaiari: “hasieratik eskatu genuen Nikel isurketen mailaren inguruko informazioa. Bilerak ere eskatu genituen, izan ere, airearen kalitatea ez da Udalen eskumena. Udalok ez ditugu baliabideak neurketa horiek egin ahal izateko, baina eskumenak ez izateak ez du esan nahi ardura ez daukagunik. Ardura handia baita gure herrietako biztanleen osasunari eragiten dieten gaiekin”, zehaztu du Adur Ezenarro Ordiziako alkateak.

Zaldibiaren kasuan, 2020ko otsailaren 6rako deitu zen bilerara gonbidatu zituzten; lehenengo aldiz izan zuten orduan arazoaren berri.

Gaur, ia urtebeteren ondoren, Eusko Jaurlaritzak eta isurien sortzaile izan diren enpresek hartutako neurriak azaldu dizkigute. Hasiera batean foko bat zegoen atzemanda Ordizian. Hor neurriak hartu, eta parametroen maila jaistea lortu bazen ere, ez zen arazoa konpondu. Beraz, beste foko bat egon zitekeela ondorioztatu zen. Zaldibian topatu zen hau. Arazoaren jatorria identifikatu zen, eta hori konpontzeko neurriak hartu ziren 2020an zehar.

Ingurumen Sailak neurri hauen emaitza zehatzak azaltzen dituen txostena 2-3 aste barru argitaratuko badu ere, aurrerapen gisa adierazi digute neurketek emandako emaitzak onak direla Ordizian zein Zaldibian, eta nikela urteko bataz besteko 20ko langaren azpitik kokatu dela. Bi Udalek gure poztasuna agertu diegu, baina baita hainbat eskaera egin ere, uste baitugu oraindik gaiari gertuko jarraipena egitea ezinbestekoa dela.

Ordiziako Udalak Eusko Jaurlaritzari gaiaren jarraipen zorrotza egiteko eskatzen dio, berresteko benetan datuen joera beheranzkoa dela.

Zaldibiako Udalaren kasuan, Gaintzako bidegurutzeko neurgailua azaroan erretiratu zuten eta Lardizabal Eskolakoa mantendu egin dute orain arte. Hala ere, hau erretiratzea erabaki dutela jakinarazi digutenez, Zaldibiako Udalak eskaera bideratuko du neurgailua bertan mantendu dadin, gutxienez 2021eko iraila-abendua tartean, airearen kalitaterako hilabete txarrenetan.

Bukatzeko, bi Udalen aldetik eskatu diegu, hainbat prozesu industrialetan aurreikusi gabeko isurketak izanda, antzeko prozesu guztietan neurri berdinak hartzeko lanak ezinbesteko ikusten ditugula. Izan ere, gure herrietan fokoak detektatu eta neurriak hartu badira ere, asko izango dira antzeman gabe egoera berean egon daitezkeen herriak lurralde osoan barrena. Honen barruan, aipatzekoa da enpresek erakutsi duten jarrera ona hasieratik harreman zuzena izan baitugu eta beharrezko neurriak hartu baitituzte.

Eusko Jaurlaritzak agindu digun txostena eskuan izatean, udal komunikazio bideetan herritarren eskuragarri jartzeko konpromisoa hartzen dugu.

Ordiziako Udalak abian jarraipena emango dio egitasmoa, herriko ikastetxeetako ikasleei zuzenduta

2017ko maiatzean abiatu zen Ordizian Oianguko Natur Eskola, Aranzadi Zientzia Elkartearen eskutik. Egitasmo honekin, Udalak herriko txikienak inguruan duten naturara gerturatu nahi ditu, eta horretarako aukera paregabea eskaintzen du Oiangu parkeak. Urtero abiatzen den proiektua da, eta Udalak argi zuen jarraibidea izan behar zuela, duen garrantziagatik. Adur Ezenarro, Ordiziako alkatea: “Oiangu altxor bat da eta gazte garenetik inguruneak eskaintzen dizkigun aukerez gozatzeko aukera izatea zorte handia da. Horregatik, ordiziarrak Oiangu gertutik ezagutzeko aukera izatearen aldeko apustua egingo dugu beti”.

Orain arte Urdaneta eta Jakintza ikastetxeko 3. zikloko ikasleekin egin dute lan Aranzadi Zientzia Elkartekoek, eta aurtengo edizioan ere hala izango da. Apirilean eta maiatzean 8 eta 12 urte bitarteko Ordiziako ikastetxeetako haurrak Oiangura igoko dira Aranzadiko begiraleekin eta bertan egun osoa irauten duten jarduerak egingo dituzte, jolas librerako astia ere utziz. Jarduerak, jolas eta tailerretan oinarritzen dituzte, non ikasleak beraiek diren Oianguko bitxikeria eta altxorrak deskubritzearen protagonistak. “Azken finean, naturarekin esperientzia zuzenak izanez eta honekiko erlazio afektibo bat sortuz, naturarekiko errespetuzko jarrerak bultzatzea da proiektu honen helburu nagusietako bat, naturari buruz ikastearekin batera”, azaldu dute Aranzadiko kideek. Izan ere, haien hitzetan, ingurune naturaletatik geroz eta urrunago dagoen gizarte honetan, honekiko ezagutza ugari galtzen ari da. Horrez gain, jakina da, zenbateko onura dakarren ingurune berde batekin harremanetan egoteak, onura hauek bereziki garrantzitsuak bilakatzen direlarik umeen ikasketa prozesuan: gaitasun motorra lantzeko aukera paregabea eskaintzen dute, harremanak sendotzen laguntzen dute, konzentrazioa handitzen laguntzen dute, gaixotasunak pairatzeko arriskua murrizten da, etab.

Iazko kasuan, esaterako, eskaintza zabaldu egin zen eta 3. ziklokoez gain, 2. zikloko ikasleak ere batu ziren egitasmora. Guztira, 540 haurrek parte hartu zuten. Yoana Garcia, Aranzadiko kideak halako balorazioa egin du: “orain arteko balorazioa oso ona da. Irakasleek eskertzen dute ikasgelatik atera eta herriko naturgune batera joatea, herriko baliabideak ezagutzeko asmoz. Bestalde, ikasleek oso ondo pasatzen dute; ekintza dinamikoak eta elkarlanean egitekoak dira. Duen berezitasuna, gainera, Oianguko biodibertsitatera egokituta dauden ekintzak egiten dituztela da, hau da, bertako landare eta fauna ezagutzen dituzte, hala nola, sagastia eta putzua.