Ahoz aho jaialdiko, Martxoaren 8ari begirako eta 'Udaberrian Martxan' ekimenaren barruko ekintzak nabarmentzen dira

Martxoko kultur agenda bete-betea dator. Batetik, Ahoz Aho jaialdiaren barruko emanaldiak (hilaren 7tik 20ra) daude. Bigarrenik, Emakumeen Nazioarteko Egunari lotutako ekintza sorta (hilaren 4tik 27ra), eta hirugarrenik, 'Udaberrian Martxan' ekimen zabalaren baitan bildutako ekitaldiak. Zuhaizti zentro sozialak ere programa berezia landu du urteurrena ospatze aldera.

MARTXOKO KULTUR AGENDA (PDF)

Hiru Oscar jaso dituen 'Whiplash' filma emango dute asteburuan, eta haurrentzako filma euskaraz izango da, 'Hiruko'

Anitza eta oparoa dator martxoko zine kartelera. Bihartik astelehenera, hiru Oscar (Taldeko aktore onena, Muntaia onena eta Soinu onena) jaso dituen Whiplash filma proiektatuko du Herri Antzokiak, eta igandean Hiruko haurrentzat, euskaraz. Martxoaren 13ko asteburuan Cincuenta sombras de Grey film entzutetsuaren txanda izango da, eta 20ekoan La mujer de negro: el ángel de la muerte. Zine alternatiboko saioak ere ez dira ohikoak izango: martxoaren 4an euskal film laburrak emango dira (Laburbira), 18an, Pink Saris, Emakumeen Egunaren harira, eta 25ean, Trashed, Ekozinema ekimenaren barruan. Martxoaren 28an, berriz, Bingen euskarazko filma ikusteko aukera izango da.

Euskaltzaleen Topaguneak antolatutako zirkuitua Ordizian abiatuko da, Hitzaroren ekimenez

Euskaltzaleen Topaguneak 12. urtez antolatu duen 'Laburbira, film laburren zirkuitua' Ordizian abiatuko da datorren asteazkenean, martxoak 4, Hitzaro Euskara Elkartearen ekimenez. Euskarazko zinemagintzaren perla txikiak ikus-entzuleei ezagutzera ematea da ekimen honen helburua, eta martxoaren 28a bitarte, 29 herritan egingo du geldialdia. Zortzi lan izango dira ikusgai, zortzi lan ezberdin, euskarazko ikus-entzunezko sorkuntzaren aniztasun eta kalitatearen erakusgarri. Zuzendari esperientziadunek, hasi berriek eta bidea urratzen dabiltzanek dute lekua edizio honetan. Emanaldia 20:30ean hasiko da Herri Antzokian, eta ordu eta laurden inguru iraungo du.

Martxoaren 7tik 20ra bitartean hainbat herrialdetako kontalariak bilduko dira Ordizian

Ahoz Aho Ahozkotasunaren Nazioarteko VII. Jaialdia martxoaren 7tik 20ra bitartean egingo da aurten. Egitarauari ipuinen ahozko narrazioak emango dio hasiera martxoaren 7an, eta Gala Nagusiarekin bukatuko da 20an. Tartean ia kontinente guztietako 20 kontalari inguru elkartuko dira. Hala ere, jaialdia abiatu abiatu da, Jakintza Ikastolako eta Urdaneta ikastetxeko ikasleak ahozkotasun eskolak hartzen ari baitira joan den astetik.

AHOZ AHO 2015. EGITARAUA