Puzgarriak, atletismo erakustaldia, Amets bideren dantza erakustaldia eta 'Ez gara Palestinaz ari' ikuskaria izango dira

Ekitaldiz bete-bete eginda dator 2014ko Euskal Jaietako bigarren larunbata. Goizean eta arratsaldean haurrentzako puzgarriak egongo dira pilotalekuan. 17:00etan, Txindoki-Jasok antolatutako Atletismo erakustaldia Plaza Nagusian; 19:00etan, Amets Bidek euskal dantzen erakustaldia egingo du herriko kaskoan; eta 22:00etan, Ander Lizarralde eta Unai Muñoa bertsolariek sortutako 'Ez gara Palestinaz ari' ikuskaria.

Dario Fok idatzitako obraren errepresentazioa 22:15ean da, Herri Antzokian

Ordiziako Urrup antzerki taldeak 'Ez dago lapurrik onik ez dakarrenik' obra taularatuko du bihar ostirala, hilak 12, Ordiziako Herri Antzokian, 22:15ean. Dario Fok idatzitako obra 2003. urtean estreinatu zuen Urrupek, eta 11 urteren ondoren, berriz errepresentatuko dute. Komedia honetan, traizioan bizi diren goi burgesiako bi bikote eta ezer ezkutatzekorik ez duen lapurra dira protagonistak.

XV. Gerriko Ikerlan-bekaren irabazle Uzuri Aboitizek, Beñat Garmendiak eta Luxia Iriondok osatu dute liburua

Gaur osteguna, hilak 11, 'Ordiziako azoka, kasu etnografiko bat' liburua aurkeztuko dute D'elikatuzen XV. Gerriko Ikerlan bekaren irabazle Uzuri Aboitizek, Beñat Garmendiak eta Luxia Iriondok. Aurkezpena 19:00etan da. Ordiziako eta Lazkaoko udalen, Maizpide Euskaltegiaren eta Gerriko kultur elkartearen babesarekin eman da liburua argitara.

Elgoibarko Mausitxa sailkatu da bigarren, eta Joseba Insausti ordiziarra hirugarren

Idiazabalgo enpresak enkanteko errekorra hautsi du, 2004. urteko 12.100 euroak nabarmen gaindituz

Segurako Ondarre baserriko Mari Karmen Muruak irabazi du Artzainek Latxa Ardi-Esnez egindako 41. Lehiaketa. Bigarren Elgoibarko Mausitxa sailkatu da, hirugarren Joseba Insausti ordiziarra, Azpeitiko Berastegi elkartea laugarren eta Iruraiz-Gaunako Hnos. Audicana Saez de Bikuña bosgarren. Gazta erdiaren enkantean, berriz, errekor guztiak hautsi ditu Idiazabalgo AMPO enpresak, 13.050 euro ordainduta, 2004an Lierni Patxi erretegiaren 12.100 euroak nabarmen gaindituz. AMPO enpresa Beasaingo Hurbileko Jaleak dendarekin aritu da lehian enkantean. Iaz, Bergarako Bolintxo Okindegiak 7.500 euro ordaindu zituen.